“Forensik Australia Husu Mill U$57 Halo Testu DNA Ba Ruin Saudozo Mauhudo”

.

Jornal Independente - Kinta-feira, 18 Outubru 2012 

Kompania Forensik Australia husu osan hamutuk mill U$57 atu halo testu DNA ba ruin Saudozo Mauhudo, entertantu kompania forensic ida seluk husu osan mill U$46 dollar Amerikanu.

 Sekretariu Estadu Antigo Kombatentes Libertasaun Nasional, Julio Sarmenti ‘Meta Malik’ dehan, rejultadu negosiasaun entre governu ho kompania rua iha Australia ho pressu diferente ba prosesu teste DNA ruin saudozo Mauhudo. 

“Rezultadu ba Australia mai ho proposta rua, ida mai ho orsamentu mill U$57 no parte ida seluk mill U$46,” dehan Sekretariu Estadu Antigo Kombatentes Libertasaun nasional Julio Sarmento iha PN (17/10). 

 Maske nune’e, tuir nia Governu seidauk iha desizaun final atu lori ruin saudozo Mauhudu nian ba Ausralia tanba to’o agora familia seidauk kolabora atu fo ran ba teste DNA ne’e.

 “Horesik mosu iha Jornal Familia lakohi kolabora, ne’e halo ami atu halo said alos,” dehan meta Malik.

 Sekretariu Estadu ne’e hateten tan katak, kuandu familia lakohi kolabora ho estadu atu halo teste DNA, Governu sei rai ruin Saudozo iha fatin ruma hodi hein kolaborasaun familia nian. 

.

Deskonfia Laen Oho Mauhudu, “Eladio ‘Duni’ Autor Nia Fen Husi PN”

.

Jornal Nacional Diario - Segunda, 15 Outubru 2012 

Diskonfia inan feton Norberta Belo nia laen mak sai autor konspirasaun hodi oho saudozu Mauhudu Ran Kadalak iha tempu okupasaun Indoensia, halo Deputadu Bancada FRETILIN, Eladio Faculto, duni Norberta Belo sai husi fatin audensia Parlamento Nasional. 

Fenomena ne’e akontese tanba deputadu Ealdio haree inan feton Norberta Belo ba asisti hela Debate orsamentu retifikativu iha Parlamentu Nasional (PN), Sexta (12/10) semana kotuk. Deputado Eladio Faculto, iha debate OR ne’e, hetan oportunidade husi Prezidenti parlamentu nasional, Vicente Guterres, tanba deputadu ne’e foti pontu de orden hodi foti kestaun sensitivu ba publiku hodi insulta inan feton Norberta Belo ne’ebe akompanha mos debate OR ne’e. 

 Ironi teb-tebes iha publiku nia oin, deputadu Eladio hatudu liman ba inan feton ne’e katak, nia tenki sai husi parlamentu nia laran no la merese atu tur iha PN. 

Hafoin tuku 13:30 OTL meiudia, remata debate tempu almoco, Eladio hamrik hodi hakbesik kedas ba inan feton Norberta ne’e hodi hatudu liman no dehan, ‘O nia laen mak oho Mauhudu. Ho laran kanek tebes halo Eladio mataben turu , tanba hanoin hikas fali saudozo Mauhudu iha momentu sira hamutuk hela kuandu Eladio Faculto foin aprende politika . Deputadu Eladio mos koalia ba sira hotu ne’ebe iha PN katak, “Nusa mak sira oho tiha Mauhudu lahatudu nia ruin, agora Mauhudu nia ruin iha ne’ebe? 

Ne’e injustisa to’o ohin loron, imi mak goza ba rai ne’e ba independensia, konseptor mak Maun Boot Xanana Gusmao, Mauhudu ho tan Mauhunu, sira nain tolu mak pioneiru ba luta libertasaun, tuir mak maun Konis Santana. 

 Hafoin ne’e, Norberta Belo ne’ebe Eladio deskonfia katak, autor nia fen ne’e, hateten katak, nia hanesan individu nia la simu ho deputadu Eladio nia atetude ne’ebe insulta hasoru nia iha PN laran. 

“Klaru bah au individu hau la simu deputadu ninia atetude ne’ebe nia halo ba hau, tanba hau hanesan aidadaun mos Timor oan sira seluk, se deputadu la dun kumpriende kona ba konstituisaun RDTL,” hateten Norberta belo ba JNDiario ho mataben iha Parlamentu nasional, Sesta (12/10) semana kotuk. 

“Hau husu ba deputadu ne’e katak, tuir lolos tenki tau ketak kazu krime hi kazu individual, Politikamente se mak bolu Indonesia mai, nusa la rezolve iha nivel altu, se hau sala lori ba Tribunal, hau oho ema nain hira iha Timor? 

Tenki tau asuntu ne’e iha nia fatin, labele ataka hau nu’udar ema sivil, sa tan hau ema feto ida, nia hatak hau iha parlamentu larana,” akresenta Norberta. 

Inan feton Norberta Belo, servisu nu’udar Asesor Rekursu Humanus iha Ministeriu Saude desde Governu Alianca Maioria Parlamentar (AMP), ne’ebe forma husi Partidu lima, hanesan CNRT, PD, ASDT, PSD no UNDERTIM to’o agora Governu Bloku Koligasaun Parlamentar (BKP), ne’ebe kompostu husi Partidu CNRT, PD no FRENTI MUDANCA. 

Inan feton Norberta nia laen rasik, nia lakohi fo sai naran tanba ema Indoenzia orizinal, nia dehan, prosesu ne’e nia rasik la hatene maibe iha lei no regulamentu mak sei regula, oras ne’e dadaun inan feton, Norberta Divorsiu tiha ona ho nia laen ne’e.

 Ba kestaun ne’e, PM Xanana Gusmao mos bolu ona Ministro Saude Sergio Lobo para atu koalia kona ba problema ne’e.

.

Forensik Ke'e Rate: "Deskonfia Ruin Mauhudo"

.

Jornal Independente - Sesta-feira, 14 Setembru 2012

Ekipa forensik Polisia Nasional Timor Leste horsehik (13/9) ke'e rate iha suku Sanirin hodi foti mate ruin ne'ebe deskonfia nudar ruin heroi boot Muhudu.

Marka Prezensa iha ke'e rate ne'e, Vice Primeiru Ministru Fernando La Sama ho Sekretariu Kombatente Luta Libertasaun nasional (Meta Malik), Sekretariu Estadu Dezenvolvimentu Lokal Samuel Mendonca no autoridade sira.

Vice Primeiru Ministru La sama hatete, Governu ho PNTL liu husi ekipa forensik ke'e hikas rate ne'ebe mak deskonfia hakoi Mahudo tanba estadu iha responsablidade ba nia eroi sira ne'ebe lakon no mate tanba defende nasaun.

Governu ne'ebe ukun sei la ignora luta ne'ebe mak Mauhudo halo ba nia nasaun hamutuk ho Heroi sira seluk.

Tanba ne'e La sama dehan, Governu sei serviso hamutuk ho familia atu aselera halo teste DNA hodi identifika identidade lolos husi ruin ne'e.

"Kazu ne'e espesial, ami hatete ba imi katak, ami sei apoia hodi aselera testu DNA," dehan la sama bainhira akompania hodi ke'e rate ne'ebe deskonfia hakoin saudozo Mauhudo iha Suku Sanarin, Sub-Distritu Balibo, Distritu Bobonaro.

Entertantu, Komandante PNTL Operasaun Armando Monteiro hatete, ruin ne'ebe mak deskonfia Mauhudo nia ruin sei halo teste hodi identifika lolos.

Testu ne'ebe mak sei hala'o, Armando dehan, teste anti mortem ne'ebe foti deklarasaun husi sasin sira kona ba faktus antes saudozo ne'e mate.

.

PM Xanana Fo Orientasaun: "La Sama Ho Ekipa Forensik Australia Ba Kehe Ruin Saudozo Mauhudu"

.

Notisia Husi TVTL - Tersa-Kalan, 11 Setembru 2012

Primeiru Ministru (PM) Kay Rala Xanana Gusmao fo orientasaun ba Vice Primeiru Ministru Fernando La Sama hamutuk ho ekipa Froensiko husi Australia ba kee ruin saudozo Mahudu iha Kinta-feira semana ne’e.

Informasaun ne’e, fo sai husi Vice Primeiru Ministru Fernando La Sama de Araujo Tersa-feira semana ne’e iha uma fukun Parlamentu Nasional hfoin simu orientasaun husi Primeiru Ministru xanana Gusmao iha loron 2 fulan Setembru liu ba.

Tuir La Sama katak, iha kinta-feira ne’e, nia rasik sei akompania husi ekipa forensic husi Australia hamutuk ho Ministeriu Solidaridade Sosial sei ba kehe ruin saudozo Mahudu, ne’ebe tuir informasaun Sefe Suku Saniri Agustu Datubuti ne’ebe lokaliza iha Distritu Bobonaro.

Entertantu, hafoin kehe ruin refere sei submete ba testu DNA hodi nune’e bele konprova.

.