Francisco Guterres 'Lu-Olo': "Prioridade Governu Labele Koalia De'it, Tenki Implementa"

.

Jornal Nacional Diario - Kinta-feira, 13 Setembru 2012

Prezidenti Partidu FRETILIN, Francisco Guterres 'Lu-Olo' hatete, programa prioridade Governu nian ne'e labele koalia deit maibe tenki implementa para bele hadia povu tomak nia moris.

"Programa sira ne'e koalia iha diskursu ne'e kapaas la halimar, ne'e ema hotu-hotu rona, atu halo redusaun ba ema kiak, atu halo infra-estrutura, atu halo buat oioin, ida ne'e ita koalia de'it ne'e furak la halimar, agora, importante maka ninia implementasaun ne'e atu la'o oinsa, mekanismu, meus saida maka ita uza para depois ita atu bele realiza buat sira ne'e hotu, ida ne'e maka importante," hateten Francisco Guterres Lu-Olo ba Jornalista sira Kuarta (12/9) iha Palacio Prezidenti Bairo-Pite, Dili, wainhira fo opiniaun kona ba programa kintu Governu konstitusional nian ne'ebe mak aprejenta ba Parlamentu nasional hodi halao diskusaun.

Tuir eis Prezidenti parlamentu Nasional ne'e mos dehan, Kintu Governu hasoru difikuldades boot teb-tebes, tanba ne'e FRETILIN duvida implementasaun programa Governu ne'ebe atu hatudu rejultadu ba povu nia moris diak.

"Hau pesoalmente haree katak, sira nia Governu iha difikuldades boot tebe-tebes, ita akompanhia took saida mak atu akontese," Haktuir Lu-Olo.

Lu-Olo mos hatutan tan katak, implementasaun Governu nian atu lao diak, i8mportante liu maka planu diak no programa diak, maibe importante mos tenki tau ema ne'ebe mak iha kapasidade hodi bele zere programa Governu ninian.

"Progresu atu realiza ho diak, se enkuantu planu ne'e diak i nia programa mos tenki diak, programa neé kuandu atu diak, neé so presizu tenki tau dispoin ema mos ho kapasidade para depois atu bele implementa programa ida ne'e, i depois meus sira ne'e hotu tenki tau tuir halo lolos, se ita tau ida keta-ketak, hau hanoin ne'e mos susar atu lao ba oin," afirma Lu-Olo.

.

Governu Aprezenta Programa Tinan 5: "Xanana: Sei Lori Moris Diak Ba Povu"

.

Jornal Nacional Diario - Kinta-feira, 13 Setembru 2012

V Governu konstitusional ne'ebe lidera husi Primeiru Ministru Kay Rala xanana Gusmao ofisialmente aprejenta programa governu ba tinan 5 (2012 to'o 2017) nian ba Parlamentu Nasional (PN).

Iha aprezenta planu Governu nia ne'e, PM Xanana hateten, programa governu nia ne'e sei lori dezenvolvimentu no moris diak ba povu Timor Leste.

Planu Governu tinan lima (2012-2017) ne'e, rejumu iha perioridade kapital sosial, dezenvolvimentu ekonomiku, no kriasaun empregu, infra-estrutura e reforsa konsolidasaun iha kuadrus institusional.

Iha seitor kapital Sosial, PM Xanana dehan, sei investe makas iha area saude hodi hasae kualidade no asesu ba saude, edukasaun, formasaun profesional, informasaun, justisa sosial no ba kultura.

PM Xanana mos afirma katak, tinan lima mai ne'e governu promete atu hadia kondisaun eskola, rejolve problema meza kadeira no hadia kualidade edukasaun.

Nune'e mos iha seitor infra-estrutura, governu sei hadia tomak estrada nasionais, distritais no rurais ho planu implementasaun ne'ebe fazeadas.

"Atu hadia tomak estrada nasionais, distritais no rurais, konstruksaun foun estrada Dili-Manatuto-Baucau, konstruksaun foun estrada Manatuto ba Natarbora, konstruksaun foun Estrada Dili-Likisa-Bobonaro, no hahu projeitu rodaviariu, Dili, Aileu, Maubisse-Aituto, Ainaro to'o Kasa," dehan PM Xanana.

Aliende ne'e, PM Xanana mos dehan, sei halo mos konsepsaun ba programa regional ba konstruksaun Porto no sei haree Porto foun no halo reparasaunb ba Porto ne'ebe iha ona hanesan, instalasaun entre Laga, Baucau, Lauteme, Atauro, Cairavela, Manatuto ho Wekusse.

Iha parte Aeroporto, sei hasia mos aeroporto Nicolau Lobato no aeroporto Baucau, sei dezenvolve nuudar Aeroporto ba karga no sei sai baze militar.

"Sei dezenvolve planu aviasaun ba distritu hodi rehabilita pistas areas iha Suai, Oekuse,Lospalos, Maliana, Vikeke, Atauro no Same," Promete Xanana.

Planu tinan lima, PM Xanana dehan, sei aproveita masimu ho seitor petrolifeiru neébe sai hanesan pilar fundamental ba dezenvolvimentu Timor Leste tanba rikusoin mina neébe mak iha bele multiplika benefisius ba Timor oan tomak.

Le'e mis iha ne'e: ME halo ona planu no tau ona osan ba merenda escolar, ba alunu ida hamutuk $0.15 centimu/ loron.
,