“Organizasaun Artimarsiais Suku Tibar Tara Bandu”

.

Notisia Husi TVTL - Sesta-Kalan, 28 Setembru 2012 

Organizasaun artimarsiais no joventude hala’o juramentu atu hakribi violensia, julgamentu ne’e hala’o no partisipa husi Ministra Solidaridade Sosial, Administrador Distritu Likisa, reprejetante PNTL Likisa, Polisia Militar iha suku Tibar, Likisa.

 Organizasaun artimarsiais husi PSHT, Kera Sakti, Korka, THS, THM, hamutuk ho joventude sira iha Suku Tibar, Sub Distritu Bazartete, Distritu Likisa, kinta feira ne’e hala’o juramentu hodi hemu tua kaor ho animal ran hodi promete ba malu, iha autoridade lokal no komunidade sira nia oin hodi lakohi kria konflitu baku malu entre artimarsiais.

 Hakribi konflitu no iha hanoin ida de’it, hakarak hadia ba futuru no kria dezenvolvimentu, hadomi paz no dame iha komunidade nia leet. Aliende ne’e, lia nain sira mos lalohu ne’ebe tau ona bua ho malus ba sira nia ulun hanesan fo hikas matak malirin.

 “Deklara katak, ami jura ba foho lulik, matebian, ramelau, kablaki, fatuk lulik, we lulik, no rai lulik tibar no mos iha nain ulun sira nia oin, ami pronto simu malu fila fali ho neon ho laran tomak sein obriga husi parte ruma, ami hakribi ba aktu violensia no konflitu iha suku Tibar, ami promete sei la halo tan violensia,” deklara joventude. 

Iha fatin hanesan, suku ida-idak asina deklarasaun simu malu no lulik neebe lia nain sira prepara ona. Reprejetante organizasaun PSHT no kera Sakti hateten, liu husi juramentu ida ne’e, husi oin ba oin, se ba dame malu no sei kumpri tuir bandu ne’ebe iha, se karik mak mosu nafatin konflitu sei multa osan ho animal hanesan, karau 4 ho osan U$ 1000,00 ba Aldeia 4 iha Suku Tibar.

.