Prezidente Repúblika sei hala’o vizita traballu durante semana ida ba distritus sira

.

FOR IMMEDIATE RELEASE : 

Prezidente Repúblika sei hala’o vizita traballu durante semana ida ba distritus sira Dili, Timor Leste, 28 Setembru 2012:

Prezidente Repúblika, Taur Matan Ruak, Segunda feira semana oin sei hala’o vizita traballu durante semana ida ba distritu Covalima, Ainaro no Aileu hosi loron 1 to’o 6 fulan Outubru 2012. 

Obejtivu vizita ne’e mak atu haree besik liu-tan kondisaun real iha distritu hirak ne’e, rona preokupasoens no ideias hosi komunidade sira iha baze, divulga politika Prezidente Repúblika nian, inklui atu reforsa papel lideransa sira iha baze. 

Vizita semana ida ne’e sei halao uluk ba sub distritu Fohorem, distritu Covalima iha loron 1 Outubru hodi hala’o dialogu ho komunidade iha fatin refere. 

Hafoin ne’e, iha loron 2 Outubru Prezidente no ninia komitiva sei kontinua viazen ne’e ba sub distritu Suai Villa. Iha vizita ne’e Xefe Estadu sei ba haree fatin minarai nian, vizita hospital referal Suai, eskola primária, no monumentu Setembru Negra, hafoin kontinua hala’o sorumutu ho autoridades distrital no komunidade sira. Iha loron 3 fulan Outubru Xefe Estadu ho komitiva sei kontinua hakat-an ba distritu Ainaro hodi hala’o dialogu ho komunidade iha Suku Casa, inklui vizita mos fatin Masakre Jakarta II, hospital Ainaro, no kontinua dialogu ho komunidade iha sub distritu Ainaro Vila, inklui sorumutu ho autoridades distrital husi distritu refere. Entertantu iha loron 4 fulan Outubru, Xefe Estadu ho komitiva kontinua hala’o viazen ba sub distritu Maubisse hodi hala’o mos dialogu ho komunidade sub distritu ne’e. 

Antes fila hikas mai Dili iha loron 6 Outubru, iha loron 5 fulan Outubru, Xefe Estadu ho ninia komitiva kontinua hala’o viazen ba distritu Aileu hodi dala ida-tan hala’o dialogu ho komunidade iha Suku Lurai, hala’o sorumutu ho autoredades lokal, no vizita mos fatin Turístiku iha sub distritu Remexio.

 Hola parte iha delegasaun Xefe Estadu nian ne’e mak hanesan, Primeira Dama, Isabel Ferreira, Asesores Prezidente Repúblika nian balun, membrus governu, no korpus diplomatiku balun.

 Kontatu: Roberto de Sousa ( OIC) Palacio Presidenti, Aitarak laran Dili, Timor Leste Telemovel : +670779 444 22 E-mail : assessorict@presidencia.tl

.