La Rezolve Kazu My Flower: "F-FDTL Sei Lakon Konfiansa"

.

Jornal Timor Post - Kuarta-feira, 12 Setembru 2012

Fundasaun Mahein (FM) husu ba Ministeriu Publiku investiga kazu agresaun fiziku husi membru F-FDTL hasoru ema sivil ho seriu, nune'e labele halakon konfiansa povu ba Instrituisaun F-FDTL.

"Tuir Fundasaun Mahein nia hare katak, ida ne'e asuntu ida ne'ebe maka seriu," hateten Nelson Belo nuudar diretor ezekutivu Fundasaun Mahein ba Jornalista sira iha nia serviso fatin, Balide, Dili, Tersa (11/9).

Nia hateten, atu prevene labele akontese tana iha futuru, maka husu para investigasaun bele halo didiak depois rezultadu investigasaun ne'e uza, aliende ne'e, halo asaun displinar iha instituisaun F-FDTL laran, husu mos atu bele prosesu ba Ministeriu Publiku.

Belo mos haktuir tan katak, preokupasaun boot ida maka agresaun fiziku militar hasoru ema sivil akontese dala barak ona, tuir nia, to'o agora mos Parlamentu Nasional Komisaun B mos seidauk foti asuntu ne'e, Ministeriu defeza mos seidauk foti kestaun kona ba ida ne'e, entaun, ita la hatene prosesu ne'e lao oinsa ona.

Hatan kona-ba iha kazu agresaun Fiziku ne'e mos envolve Boby (Lere nia oan) bele fo impaktu ba F-FDTL, Diretor FM ne'e hateten, Boby hanesan ema sivil, se kuandu nia halo sala tenke ba hatan tuir lei ne'ebe mak vigora iha Timor leste.

"Boby, nia ema sivil kuandu nia halo sala tenki komete duni nia sala, lei Timor ne'e la hare katak, ho ne'e se, karik nia halo sala duni tenki ba prosesu iha Ministeriu Publiku," Belo sujere.

Nelson Belo hatutan, regra iha komunidade, nia tenke hakruk tanba nia moris ho komunidade, slogan ida ne'ebe maka dehan katak, militar ne'e husi povu ba povu no fila fali ba povu, ne'e tenki apika duni.

Nia mos hateten tan katak, Ema barak mak mate no forsa ne'e mak forsa nasaun nian, ema se de'it mak tama iha F-FDTL la bele halo atetude at hodi estraga instituisaun nian naran.

.