"PM Xanana Promete Lori Pipeline GS Mai TL"

.

Jornal Nacional Diario - Sesta-feira, 14 Setembru 2012

Primeiru Ministru (PM), Kay Rala Xanana Gusmao, promete katak, V Governu Konstitusional ne'ebe nia lidera, sei lori Pipeline Greater Sunrise (GS) mai rai maran Timor Leste nian, atu nune'e bele fo serviso ba povu tomak no mos hasae kresimentu ekonomia nasaun ninian.

Chefe Governu deklara kestaun ne'e iha Parlamentu Nasional, kinta (13/9), bainhira ba aprejenta planu no programa V Governu konstitusional nian iha tinan lima nia laran atu bele hetan apresiasaun husi deputadu III legislatura.

PM Xanana hatutan tan katak, Planu Estratejia dezenvolvimentu Nasional (PEDN) kotempla ona programa no ba longu prazu nian, tanba ne'e iha kintu Governu sei fo perioridade ba hadia infraestrutura bazika, liu-liu ba hadia fatin ba suplay base iha Sub Distritu Suai, Distritu Covalima, refinaria iha suku Betano, sub Distritu Same, Distritu Manufahi, ne'ebe naran projetu Tasi Mane.

"Hau bele hateten iha ne'e (Parlamentu Nasional) katak, Pipeline Greater Surise ita sei lori mai, tanba ne'e mak Governu haree hela ona fasilidade sira ne'ebe atu koresponde ba planu ne'e," dehan PM xanana hodi responde deputado sira husi Bancada opozisaun FRETILIN kona ba planu Governu atu dada Pipeline mai Timor Leste.

Iha Oportunidade ne'e, PM Xanana mos hateten, iha tinan lima nia laran ne'e Governu sei foka liu ba hadia infraestrutura hanesan estrada, Be mos, Saude, edukasaun, no apektu sosial hirak seluk.

Iha oportunidade ne'e, Xefe bancada Partidu FRETILIN, Aniceto Guterres iha plenaria hateten mos katak, nia sente duvidas tebes ho Programa kintu (V) Governu konstitusional ne'ebe aprezenta iha PN, tanba sei la realiza tuir saida mak Governu promete, tanba experensia tinan lima liu ba (Governasaun AMP) promete buat barak, maibe la realiza no povu kontinua halerik ba nessidade baziku no infra-estrutura, maske Governu fakar osan povu nian barak.

.

FRETILIN Kritika Maka'as Programa Governu: "Deputadu Bloku Koligasaun Sai 'Penontong"

.

Jornal Nacional Diario - Kinta-feira, 13 Setembru 2012

Iha Kuarta (12/9) horseik Parlamentu Nasional (PN) halo apresiasaun ba programa V Governu Konstitusional ne'ebe atu implementa ba tinan naruk hodi hasai povu husi pobreza ba moris diak.

Bainhira PM Xanana Gusmao remata nia diskursu, Prezidenti PN loke sesaun debate ho situasaun livre i uza minutu 5 kada deputadu atu hato'o sira nia apresiasaun.

Maioria Bancada FRETILIN fo kritikas ne'ebe manas ba programa Governu nian, tanba konsidera Governu ne'e mehi deit iha loron manas hodi estraga povu nia osan.

Tanba, realidade hatudu tinan lima Governu laiha progresu signifika iha area infra-estrutura, maske lao laiha kualidade, ho kritikas hirak ne'e, nune'e, deputadu husi bloku koligasaun balun sai penonton.

Nune'e, Prezidenti bancada FRETILIN Aniceto Guterres Lopes hatete katak, programa ne'e mehi no ambisouzo de'it, tamba kabe ba governasaun anterior (tinan lima ba kotuk) promesas sira ne'e seidauk implementa hotu, maske implementa maibe laiha kualidade, oinsa mak atu implementa tan programa ida furak hanesan ne'e.

"Hau konkorda ba PM nia liafuan katak, programa ne'e ambisiozu i hau senti ne'e mehi deit, tanba ita hare fila fali ba kotuk buat barak ke Governu husik hela, maske halo maibe nia rejultadu sei laiha, tanba programa hirak ne'e atu implementa iha tinan lima, ne'e imposivel," dehan deputadu Aniceto Guterres iha sala plenaria PN.

Nune'e mos Vise Prezidenti Bancada FRETILIN Francisco Miranda Branco hatete katak, programa ne'e kapas tebes, maibe sei estraga povu nia osan, tanba haree deit ba programa atu hari uma ba komunidade, nia haruka halo kedas iha rai liur maka haruka mai, entaun Timor Leste presiza hasai osan barak atu harii umka ba komunidade.

"Ami lakestiaona kustu, maibe ami kestiaona se karik hanesan ne'e benefisiu no kualidade duni ka lae ba povu, tanba referensia husi tinan lima ba kotuk ami preokupa," dehan nia.

Deputadu ne'e realsa katak, bainhira aprejenta planu ne'e katak povu tomak sei hetan benefisiu, maibe realidade kuandu mosu oin seluk, ida ne'ebe goza ne'e grupu balun de'it, ne'ebe tenki muda mentalidade ida ne'ebe gasta osan laiha benefisiu ba povu.

.

"FRETILIN Husu Xanana Realistiku"

.

Jornal Timor Post - Kinta-feira, 13 Setembru 2012

Bancada FRETILIN iha uma fukun Parlamentu Nasional (PN), duvida tebes ho implementasaun programa governu nian atu halakon kiak iha Timor-Leste, tanba ne'e, sira husu ba Primeiru Ministru (PM) Xanana Gusmao atu labele koalia barak maibe tenke realistiku.

Bancada FRETILIN, liu husi Xefi Bancada Aniceto Guterres levanta kestaun ne'e, relasiona ho aprezentasaun planu Governu ba tinan lima ne'ebe PM xanana rasik ho nia membru sira offisialmente ba aprezenta iha Plenaria PN, Kuarta (12/9).

Nune'e, Bancada FRETILIN nafatin preokupa, liu-liu ba kapasidade rekursu umanus ne'ebe tuir sira seidauk sufisiente atu halo jestaun ho didiak ho kustu ne'ebe boot.

"Hau duvidas Senor Primeiru Ministru, ita boot nia programa ida ne'e realistiku ka lae?," afirma Xefi bancada FRETILIN, Aniceto guterres.

Aniceto konsidera, to'o oras ne'e situasaun administrasaun publika sei fraku tebes, rekursu umanus seidauk sufisiente, problema jestaun sei infrenta problema boa-governasaun, tanba ne'e, nia hatutan, nia duvida tebes ho programa governu ne'ebe sei gasta osan boot.

Aniceto mos haktuir dehan katak, tuir loloos, PM xanana iha aprejentasaun programa Governu ne'e tenki temi katak, wainhira osan mina rai ne'ebe oras ne'e estadu uza hela, to'o tempo ida maran, estadu atu gasta tan osan husi ne'ebe.

"Hau hanoin ita agora dehan, ita seguru tanba ita iha fundu, maibe deklarasaun Primeiru Ministru iha aprezentasaun ne'e la temin katak, se fundu ne'e hotu karik, foti osan husi ne'ebe," sublinha Aniceto.

.