“PR Taur Rekonese Sidadaun TL Sei Pasivu Ba Dezenvolvimentu”

.

Jornal Independente - Sesta-feira, 12 Outubru 2012

Prezidenti Republika, Taur Matan Ruak rekonese katak, sidadaun Timor oan ohin loron pasivu liu, hodi ladun hola parte iha prosesu dezenvolvimentu nasional.

Tuir nia, mentalidade sidadaun Timor Leste oras ne’e dependensia makas ba estadu hodi fo ajuda kompara ho sidadaun jerasaun tuan ne’ebe halo esforsu makaas atu oinsa bele produz buat ruma.

 “Ho situasaun ne’e, hau Prezidenti Republika mos ulun fatuk moras, funsionariu ne’ebe mak baruk tama servisu, diak liu hasai tiha de’it, estadu lakohi hakiak sidadaun hanesan ne’e,” dehan Taur Matan Ruak iha Palasiu Nobre, Lahane, (10/10).

Nia dehan, ajensia internasional sira oras ne’e dadaun hafuhu hela sidadaun TL tomak atu oinsa bele la’o maka’as no lalais hodi halais prosesu dezenvolvimentu nasional.

Nua ne’e, Taur Matan Ruak hateten, mentalidade sidadaun Timor oan iha kapital Dili seidauk maneja tempu ho diak tanba realidade hatudu katak, oras tama servisu hahu tuku 08:00 dadersan, maibe funsionariu sira foin dader iha tuku 11:00 depois tama fali tuku 2:00 orokraik ba tur bosok de’it fila fali ba uma ona.

 Nune’e, kuandu fila-fali ba Distritu haree situasaun dezenvolvimentu ne’ebe seidauk la’o nia foti konkluzaun katak, Timor Leste independensia tinan 10 ona, maibe seidauk iha progresu signifikativu.

Ba kestaun nee, iha fatin hanesan, Reitor UNTL, Aurelio Guterres hateten, ema barak abandona sira nia knua mai kapital Dili, tanba iha moris diak maski hela iha Dili ne’e la promete moris diak ba ema hotu, kestaun ne’e akontese tanba sistema dezenvolvimentu iha rai laran mak seidauk abranje to’o area remota hanesan edifisiu eskola, saude no seluk tan.

Nia mos rekomenda ba Governu katak, atu evita labele akontese urbanizasaun, estadu tomak tenke hala’o dezenvolvimentu husi nivel baze mak foin mai nivel nasional.

.