Asidente Trafiku Nain 2 Mate, 2 Kanek Todan “Iha Ermera Nain 1 Mate, 36 Kanek”

.

Jornal Nacional Diario - Tersa-feira, 03 Setembru 2013

Segunda (02/9) maizumenus tuku 14:00 meudia ema nain 2 mate no nain 2 kanek todan hafoin mosu asidente trafiku kareta Soke Malu iha Comoro.

Kazu ne’e akontese bainhira Bascolante ida ho numeru matrikula Policia 56.835, halai ho Velocidademaka’as hodi soke kareta Bascolante 2, pajero ida no Mikrolet 010 2 iha area supermerkado Lider Comoro, Dili iha tuku 12 ho balun oras Timor Leste.

Akontesementu ne’e rejulta vitima ida mate fatin, ida mate iha kareta Bascolante ne’e tula sasan material konstruksaun atu sai husi kapital Dili ba Distritu sira maibe seidauk hatene lolos fatin objetivu tanba kundutor foin halai arangka sai.

Nune’e mos iha loron sabadu (31/8) semana kotuk maizumenus tuku 11:30 akontese asidenti ida iha Distritu ermera, Aldeia Manutali, Suku Riheu, kareta baskolante ida ho Numeru Matrikula Policia 50.669 baku fila. Akontesementu ne’e rejulta ema nain 6 kanek todan, 30 kma’an no 1 mate fatin. Policia Tranzito Nacional Inspektor Xefi, Antonio L. C. Soares haktuir katak, motivu husi akontesementu ne’e tanba kareta nia kondisaun travaun la diak, nune’e hodi rejulta taka fila.

“Akontesmentu ne’e rejulta ema nain ida mate, kanek todan 6, kanek kma’an 30, kondisaun kudutor normal no kareta iha tiha ona Policia Distritu Ermera, Maibe kanek sira ne’e lori mai ona Opsital Nasional Guido valadares (HNGV), Bidau, Dili,” haktuir Antonio Soares iha nia servisu fatin, Kuarte Geral, Kaikoli, Dili, Segunda (02/9).

Nune’e mos, iha loron Kuarta (28/8) semana kotuk, asidenti hanesan akontese iha fatin ne’ebe hanesan Distritu Ermera nian, kareta track ho numeru matrikula Policia 53.144, iha akontesementu ne’e rejulta ema nain 2 mate, kanek kma’an 6, todan 3.

Kareta ne’e tula sasan konstruksaun nian mak pazeiros sira ne’e sa’e tuir iha dalan, kareta ne’e husi Dili atu ba Ermera, motivu husi akontesementu ne’e katak, kondisaun kareta la forsa atu sa’e ne’ebe hakiduk fali mak baku fila.

Entertantu, sodenti ne’e laos deit akontese iha Distritu ermera maibe mos akontese iha kapital Dili rasik iha Domingu (01/9) kalan maizumenus tuku 22:00 iha area Kulu Hun nian, motor ho motor mak soke malu rejulta nain ida mate.

.