“PR Taur Vizita Estadu Ba Portugal, Kuba No ONU”

.

Foto de, Presidência da República de Timor-Leste - Facebook

Jornal Nacional Diario - Kuarta-feira, 18 Setembru 2013

Prezidenti Republika (PR) Taur Matan Ruak, ohin Kuarta (18/9), ofisialmente hala’o vizita Estadu ba Nasaun Portugal, Kuba inklui mos sei Partisipa Assembleia Jeral Organizasaun Nasoens Unidas ba dala 68 iha Nova Iorque. 

 Vizita ne’e Xefe Estadu sei akompania mos Primeira Dama Timor-Leste, Isabel Ferreira no vizita ne’e sei hala’o durante loron 16 nia laran, hahu dia 18/9 to’o 03/10.

Tuir agenda Prezidenti da Republika nian ne’ebe mak Jornal Nacional Diario simu husi Media prezidensia da Republika katak, Kuarta feira ne’e Xefe Estadu husik Timor-Leste hodi hahu nia vizita Estadu ba Portugal husi loron 20 to’o 23 fulan ne’e, durante estadia iha Portugal, Xefi Estadu sei hasoru malu ho nia amologu, Cavaco Silva, Primeiru Ministru Portugal, Pedro Passos Coelho, komunidade Timorense ne’ebe rejidente iha Portugal inklui mos estudante Timor oan ne’ebe oras ne’e dadauk hala’o estudu iha pais refere.

 Hafoin hala’o vizita iha Portugal, Prezidenti Republika ho delegasaun sei kontinua viazen ba Nova Iorque, Estadus Unidus Amerika husi loron 23 to’o 26 fulan Setembru hodi partisipa iha sesaun Asembleia Jeral Nasoens Unidas nian bad ala 68.

Iha Asembleia jeral, Xefe Estadu sei iha oportunidade hodi hato’o diskursu ba asembleia tomak. Iha biban ne’e, Xefi Estadu mos sei halao enkontru kortezia ho nia homologu sira husi paizes amigu balun inklui ho instituisaun internasional balun.

Entertantu, husi Nova Iorque, Xefi Estadu ho delegasaun sei hala’o viazen ba Kuba, iha vizita ne’e xefi estadu sei hala’o durante loron 26 to’o 30 Setembru.

Durante estadia iha Kuba, Xefi Estadu sei hasoru malu ho nia homolgu Raul Castro no governantes balun Kuba nian. Iha vizita ne’e Xefi Estadu sei akompania husi Ministru negosiu Estranjeiru no Kooperasaun (MNEK) Jose Luis Guterres inklui mos membru Governu balun.

.