Sekretaria PM Rui Duni Jornalista Iha Palacio Governu

.

Suara Timor Lorosae - 21 de março de 2016

DILI – Sekretaria Primeiru Ministru Rui Maria de Araujo neebe ho naran Estela Asis de Araujo duni jornalista husi media Nasional sira, neebe mak durante nee halao kobertura ba aktividade Primeiru Ministru nian iha Palacio do Governu.

Hahalok husi sekretaria Primeiru Ministru nian neebe duni jornalista sira nee akontese iha loron Sigunda (21/0302016) oras tuku 09:30 wainhira jornalista sira neebe durante nee halo kobertura ba aktividade PM husi media Diario Nasional, Timor Post, STL, Timor Roman, RTTL no Independente tur hein hela Ministru Defesa, Ministru Interior, Maijor Jeneral F-FDTL nomos Komisariu PNTL neebe mak halao enkontru hela ho Primeiru Ministru iha Palacio do Governu nia oin.

Imi mai huhsi neebe? Imi tur iha nee halo saida? Imi servisu iha nee ka? Imi hetan autorijasaun husi se?” Dehan sekretaria PM nian nee ho oin buis no hirus wainhira hare jornalista sira tur hein hela iha Palacio Governu oin.

Remata kolia sai lia fuan sira nee ba jornalistas sira, jornalista Diario Nasional, Napoliao Xavier, hatan hodi haksesuk malu ho sekretaria PM Rui Maria de Araujo hodi dehan, “Ami husi media (jornalista) ami mak lor-loron halao kobertura ba aktividade PM nian hahu kedan husi Kuatru no Kintu Governu Konstitusional neebe lidera husi eis PM Xanana Gusmao too Sestu Governu Konstitusional neebe mak lidera husi PM Rui Maria de Araujo, ami mai atu halo kobertura laos atu halimar iha palacio do Governu nee,”

Napoleao Xavier mos hatutan nia lamenta tebes ho atetude Sekretaria Primeiru Ministru neebe mak halo jornalista sira laran moras tanba durante halo kobertura iha Palacio Governu iha tinan barak nia laran ona hahu husi tempu eis PM Xanana Gusmao nia lideransa, iha kuatru no kintu governu konstitusional too ohin loron foin primeira ves hetan duni husi sekretaria PM Rui Maria de Araujo.

Iha fatin hanesan Jornalista Timor Roman, Marcal da Costa Martins, mos hatete rajaun sekretaria PM siak hodi duni jornalista tanba nia bandu atu labele tur iha Palacio do Governu nia oin, maibe realidade iha Palaco do Governu laiha fatin ba Media sira hanesan iha Palacio Prezidensial.

Hahalok husi Sekretaria PM nian nee laos deit halo ba jornalista inklui siguransa sivil sira neebe mak durante nee halo siguransa iha Palacio do Governu, tanba tuir siguransa balu katak bebeik ona sekretaria nee mos halo intervein ba sira nia servisu siguransa nomos haruka siguransa sivil. Depois remata diskute malu ho jornalista sira, Media Oficer PM, Fransisca Gonsalves, husu kedan diskulpa ba jornalista sira. Laos nee deit sira mos prepara kedan fatin kompletu ho kadeira 8 ba jornalista sira neebe mak halo kobertura ba aktividade PM nian. Thomas Sanches

.