Jornal Independente - Tersa-feira, 09 Outubru 2012
Parlamentu Nasional aviza maka’as ba governu atu kuidadu ho kontratu
bainhira atu implementa projeitu ruma, atu nune’e labele estraga osan.
Pozisaun ne’e, reprezetante povu nian iha uma fukun PN foti bazeia ba
esperensia aat ne’ebe governu komete hanesan konstrusaun Portu Hera
ne’ebe estadu lakon osan saugate maske portu ne’e rasik la utiliza
tanba failansu kontratu.
Deputada husi Bloku Koligasaun atual Prezidenti Komisaun B PN, Asuntu
Defeza no Seguransa, Maria Lurdes hateten, konstrusaun Portu Hera sai
hanesan esperensia aat ba governu atu labele repete iha futuru.
Prezidenti Komisaun B ne’e dehan katak, portu ne’e rasik gasta osan
millaun US$ 6 resin, maibe la konsege uza, lamentavel liu maski la
utiliza maibe governu lolos fo multa ba kompania Lifese bazeia ba
kontrau tempu ne’ebe maka iha.
“Ne’e esperensia ida, ba oin governu tenki kuidadu, haree didiak
kontratu antes fo projeitu ka aseita hodi implementa,” tenik nia iha
PN (08/10).
Lurdes dehan tan katak, presiza tebes governu mos hetan benefisiu husi
projeitu kompania ne’e, kompania labele buka hetan deit lukru.
Ba problema Portu Hera ne’e, deputada husi Bloku Koligasaun ne’e
dehan, Parlamentu liu-liu komisaun B enkoraza nafatin Azensia
Dezenvolvimentu Nasional (ADN) hodi buka solusaun ba portu ne’e.
Nune’e mos nia dehan, la’os de’ot Portu Hera, maibe projeitu seluk
ne’ebe sei mai, Governu presiza iha atensaun no analiza ne’ebe klean
atu labele gasta osan saugate.
.
Sem comentários:
Enviar um comentário
Nota: só um membro deste blogue pode publicar um comentário.