Xanana kee rai, FP preokupa halo polítika

.

Jornal Nacional Diário

Primeiru Ministru (PM) Rui Maria de Araújo informa katak, agora dada’uk besik tama ona iha eleisaun, eis Primeiru Ministru, Kay Rala Xanana Gusmão mak preokupa ho povu nia moris, hodi tuun ba povu nia leet kee rai atu satan bee labele tama ba povu nia uma, maibé Funsionáriu Públiku balun abandona sira nian servisu hodi la’o tama sai iha área rurál atu fahe solar sel ba povu, tanba eleisaun besik ona.

Rui Maria de Araújo konta istória kona-ba nia familia sira iha Ainaro katak, iha ne’ebá povu sei halerik hela kona-ba eletrisidade, bee moos no saúde.

Rui Araújo dehan, nia tian ida mai husi Ainaro hodi vizita nia iha Dili, to’o iha PM Rui nia uma, Xefi Governu ne’e husu ba nia tian ne’e dehan, di’ak ka la’e tian.

“Ehh oan, di’ak nusa fali, aat liu,” konta tuir PM Rui Araújo iha nia intervensaun hodi loke Semináriu Komisaun Funsaun Públika ne’ebé hala’o iha Centro Convenções Dili (CCD), Kuarta (16/03).

Rui Araújo dehan, nia tian ne’ebé foin mai husi Ainaro ne’e ko’alia tan ba nia katak, Timor Leste (TL) ukun-an tinan barak tiha ona, maibé povu halerik nafatin ba bee moos no estrada.

“Be o haree tok ba, ita merdeka ona, o mós Frimeiru Ministru ka infermeiru ministru nian ka, ita mak estrada kotu hela de’it, uma iha Mantasi ahi banei (laiha), fós MCIA banei, bee hemu ba kuru mota laran, buat ida naran sahudi na familia ka Sisca, ka Fransisca ne’e mós ita la haree nia oin,” konta tuir PM Rui.

Maibé PM Rui responde ba nia tian ne’e dehan, tenke pasiensia oituan tian, Governu presiza tempu atu bele halo loos buat hirak ne’e, tanba Estadu foin mak hari’i buat hotu.

Maibé PM Rui dehan, nia tian ne’e hateten fali ba nia katak, oinsa mak atu halo los buat sira ne’e, kuandu ema barak mak preokupa ho polítika, li-liu funsionáriu públiku sira.

“Oan halo los halo nusa oan, o mak bilan hela ne’e mas, ema balun buka halo polítika hela de’it, funsionáriu sira la servisu, halo polítika hotu, ita haree iha televizaun maka, sira halo hela konsolidasaun ka kaisaun, kuitadu ita haree fali seluk, ita nia avo Nana mak tu’un fali ke rai hodi satan bee labele tama ema nia uma, funsionáriu sira ba halo polítika,” PM Rui haktuir.

Rona tiha liafuan ne’e, PM Rui hakfodak hodi husu fali ba nia tian ne’e dehan, tian dehan iha Mantasi eletrisidade laiha, oinsa mak bele haree fali televizaun.

PM Rui dehan, nia tian ne’e koe ulun hamnasa de’it hodi dehan, “Eisa oan, ami mós halo polítika oan ida, be simu tiha solar sel oan ida sa, besik eleisaun ona ne’e,” konta tuir PM Rui.cos

.