Penny Wong: Governu Australia Prontu Apoiu Dezenvolve Ekonomia TL

Foto, Facebook

Timor Post - Mateus da Cruz 

DILI—Primeiru Ministru, Kay Rala Xanana Gusmão ho Ministra Negósiu Estranjeiru Austrália, Penny Wong, sesta (07/07), halao enkontru kona-ba nasaun rua nia kooperasaun bilateral iha futuru no oinsa apoia mós infraestrutura iha rai laran.

Iha enkontru ne’e, Ministra Penny Wong mós kongratula Kay Rala Xanana nu’udar Primeiru Ministru IX Governu Konstutusionál

Primeiru Ministru Xanana ema ne’ebé di’ak no sempre ko’alia ba interese Timor-Leste nian. Ha’u hato’o ona ba Primeiru-Ministru Xanana vontade husi Austrália hodi hamutuk ho Governu foun realiza futuru Timor-Leste nian no Austrália prontu nafatin atu apoia ekonomia no dezenvolvimentu Timor-Leste,” nia dehan iha Palasiu Governu.

Nia hatete, Australia no Timor Leste nu’udar belun diak desde uluk tanba ne’e Australia sei la husik Timor Leste mesak maibé ho domin ne’eb’e boot sei kontinua apoia dezenvolvimentu ekonomia iha Timor Leste.

Entretantu Xefe Governu, Xanana Gusmão, hatete, Penny Wong hanesan nia belun diak didi’ak povu no nasaun Timor-Leste nia situasaun moris.

“Ministra ne’e amiga ida di’ak tebtebes, ba ita- nia rain ami ko’alia nivel aas de’it tanba Governu dadaun diskute hela programa, no lori ba Parlamentu aprova tiha maka foin bele diskute,” nia dehan.

Nia haktuir, kada setór bele hahú kontaktu ona Austrália ba disponibilidade hodi apoia Timor-Leste bainhira programa IX Governu nian aprova iha Parlamentu nasional.

“ami ko’alia barak, no ha’u hato’o obrigado barak ba ministra, tanba ami nia enkontru ne’e diak tebe-tebes, ministra hatudu loloos ninia amizade, solidaridade, nia amor, nia domin ba rai ne’e no povu ida ne’e,” Xanana agradese.

Entretantu iha enkontru ne’e partisipa Ministru Negosiu Estranjerus, Benditos Freitas,Embaixadora Timor-Leste iha Austrália, Inês Almeida no Austrália nian maka Enkarregadu Negósiu Departamentu Negósiu Estranjeiru Austrália (DFAT), Caitlin Wilson no entidade seluk.