XANANA, CNRT NO RAMOS-HORTA LA MERESE ALKATIRI NO LU-OLO BA TOMADA DE POSSE IX GOVERNU

Oan Kiak 

Ema barak foti assuntu katak Maun Mari no Maun Lu-Olo  horseik la ba assisti tomada posse IX Governu nian? Los duni, sira la ba tanba Xanana, CNRT no Ramos-Horta la merese Alkatiri no Lu-Olo ba tomada de posse Governu foun ida ne’e. 

Durante kampanha eleitoral Maun Xanana ho ninia TBO sira hakilar beibeik kona ba Maun Mari nia relijiau no bolo nia árabe, traidor no liafuan aat sira seluk, sira mos dala barak insulta Maun Lu. 

Ne’ebe Xanana nia asulear sira foin maka hakfodak katak liderança Fretilin la ba tomada de posse? Moe laiha, imi tolok ema la halimar no hakarak ema ba rei imi nia kidun ka? 

Politika tenke halo ho matenek, beik sira maka laiha ona argumento no hahu tolok ema no insulta ema nia relijiaun, relijiaun ne’e lulik tebes, Katolika, Buda, Islão, ka relijiaun seluk, ita tenke respeita. 

Artigo 45

(Liberdade konxiénsia, relijaun no kultu ninian )

1. Ema hotu tenki iha liberdade ba konxiénsia, relijiaun no ba kultu, nune’e konfisaun relijiozu sira haketak ho Estadu.

2. Labele halo ta’uk no labele diskrimina (hatún) ema ida tanba nia konviksaun relijioza.

3. Iha garantia ba objesaun tuir konxiénsia, tuir lei haruka.

4. Iha garantia ba liberdade atu hanorin relijiaun ne’ebé de’it, maibé iha relijiaun ida-idak nia laran.

Laos hanesan Maun Xanana bolu fali ema árabe no insulta tanba sira nia raça. Timor-Leste Estado laico ida, laos relijiaun ida maka ukun ita.

Ita nia Konstituisaun bandu halo diskriminasau hasoru ema nia relijiaun, maibe Maun Xanana boot liu Konstituisaun, nia ho Ramos-Horta gosta tebe tun sae Konstituisaun tuir sira nia hakarak nomos konveniensia. 

Ramos-Horta mos halo atuasaun ho má-fé tanba nia nunca halo interferência bainhira Maun Xanana no ninia TBO sira  bolu árabe ba Maun Mari nomos insulta Maun Mari nia relijiaun, Islão, maibe Horta atua hanesan ema cínico boot  tanba iha nia Facebook nia hakerek:

“EID MUBARAK 

May this Eid 

Illuminate all humanity 

with justice and compassion.”

Horta ema hipokrita gosta maka hatudu oin ba mundo hanesan nia ema laran diak no boot. Ke nia iha respeito ba relijiaun hotu maibe iha ita nia rai rasik, ema laiha tolerância ba relijiaun seluk no insulta tun sae ema seluk nia relijiaun?

“Justice no compassion” iha ne’ebe iha Timor-Leste ba relijiaun seluk? Maun Horta ita boot karik ema ho laran falso ka hakerek arbiru deit? Malae sira dehan: karidade hahu iha ita nia uma, laos karidade, kompassion no justiça deit iha Facebook hodi hatudu aan ba nasaun seluk. Moe laiha ka? 

Prezidente da Repúblika halo juramento ida ba Maromak nomos ba povu katak nia sei hametin unidade nasional.

“Ha’u jura ba Maromak, ba Povu no ba ha'u-nia onra katak ha’u sei halo tuir loloos knaar ne’ebé ha’u simu, halo tuir no haruka halo tuir Lei-Inan no lei-oan sira no fó ha’u-nia kbiit no kapasidade tomak atu tuba-netik no hametin ukun an rasik no unidade nasaun nian.”

Maun Horta jura arbiru deit ka, bainhira dehan katak sei defende unidade nasaun? Defende ita nia nasaun, laos ba sai ATAN ba CNRT ka ba Maun Xanana, maibe defende unidade nasaun nian nomos povu Timor tomak no tenke xama atensaun ba Xanana nomos ba ninia asulear sira bainhira sira insulta Maun Mari tanba ninia relijiaun ka ema se se deit ninia relijiaun. 

Foin CNRT hili senhora Lay hodi sai Prezidente Parlamento, imajina took ke ema Fretilin nomos ninia líder  bolu prezidente PN, ema matan bubo, Xina Pirata, Xina naokteen no seluk tan. Maun Horta sei halo interferência ka lae? 

Ita hotu mai aprende ho Maun Taur saída maka dignidade politika, imi nain rua mos iha buat barak ba aprende ho Maun Taur. Lee saída maka Maun Taur tau iha Facebook  no tau iha imi nia kakutak katak iha politika ita iha adversariu politiku no labele halo konfuzaun ho inimigo. Laiha inimigu iha politika, iha deit adversariu, imi keta halo konfuzaun iha imi nia kakutak foer.

“Hosi Ex Primeiro-Ministro: S.E. Taur Matan Ruak Facebook

Ita tenke muda abítu:

Dezde I Governu  to'o mai VII Governu  iha transferénsia  poder ba  Governu  foun, la iha  marka prezensa ruma hosi Primeiru-Ministru no Membru  Governu  sesante ruma iha serimónia  pose. Iha epoka ida ne’e  S.E. Eis Primeiru-Ministru  Jenerál Taur Matan Ruak hakarak  muda abítu  tradisionál  ida ne'e i lakohi abítu ida ne’e  kontinua buras  ba bebeik  iha ita rain. Nune'e mak Eselénsia   Eis Primeiru-Ministru  Jenerál Taur Matan Ruak hamutuk  ho nia  elenku Governamental  deside marka prezensa iha serimónia  pose IX Governu nian hodi  hatudu ba públiku  katak ita iha responsabilidade  hodi entrega poder ho di'ak  ba susesor sira independentemente  iha diferensas.

Nasaun ne'e  tenke la'o  ba oin  independentemente  se mak ukun, tanba ita-nia objetivu mak oinsá  hasai ita-nia povu hosi beik, kiak no mukit,  ita hakarak  Timoroan hotu hotu  sente katak ukun an ida ne'e vale apena sira mós  sente, la'os  ema balun de'it  mak sente, ida ne’e  mak ita-nia objetivu  loloos hosi UKUN  AN ida ne'e.

Hakuak boot hosi Jenerál Taur Matan Ruak 

Prezidente Repúblika   períodu 2012-2017 

Primeiru-Ministru  VIIIGK  períodu 2018-2023”

________________

Rona Maun Taur  ka lae, Maun Horta no Maun Xanana? Husu ba imi ukun ho tolerância, fuan no honestidade tanba rai lulik ida ne’e Timor Oan hotu nian, laos imi nia deit  ka imi nia kusta deit! 

Moe oituan ba...