Kazu Porto Hera: “Lu-Olo Fiar Tribunal Sei Julga PM Xanana Gusmao”

.

Jornal Nacional Diario - Segunda, 15 Outubru 2012 

 Prezidenti partidu FRETILIN, Francisco Guterres Lu-Olo garante fiar katak, tempu ruma Tribunal sei halo julgamentu ba Primeiru Ministru (PM) Xanana Gusmao, tanba IV Governu Konstitusional ne’ebe lidera husi Xanana Gusmao la hare didiak kauza kontratu ho kompania internasional Lifes Enginering ba mega projetu porto temporariu komponente Naval nian iha Suku Hera, Distritu Dili. 

Mega projeitu ne’ebe tinan kotuk Governu deside fo single source ba kompania lifes Enginering husi Australia la iha kualidade no agora tohar tiha ona, maibe governu kontinua tau tan osan milaun 1.1 USD iha orsamentu retifikativu hodi selu projeitu ne’ebe laiha kualidade. 

Mega projeitu ne’e, inisiu tau orsamentu 4 USD, maibe tanba iha adisional osan ba projeitu ne’e nakfilak tiha ba milaun 7.5 USD. At liu tan, projeitu ne’e laiha kualidade mos Governu kontinua tau tan milaun 1.1 USD iha orsamentu retifikativu hodi selu kompania lifes Enginering. 

“Governu orsamenta tiha halo porto ida ne’e, depois la iha garantia tan no at tiha fali, Governu aumenta tan osan para hadia fila fali obra ne’ebe la iha kualidade, pior liu tan, iha kontratu la iha klauza ida para garantia katak, bainhira ponte ne’e at to’o iha tempu ida ne’e, kompania sira tenki haree nafatin, la’os mai para atu aumenta tan osa,” afirma Francisco Guterres Lu-Olo hodi rsponde JNDiario iha parlamentu Nasional, hafoin akompanha debate Orsamentu Retifikativu, Kinta (11/10). 

 Lu-Olo sublinha katak, governu tenki responsabliza ba failnasu ida ne’e, tanba governu maka la hare klauza kontra ho Lifes Engenering no la iha jestaun ida diak kona ba projeitu ne’ebe sira halo.

 “Hau hare governu la iha responsablidade ba kazu ida ne’e, tanba PM Xanana hare katak, lalika responsabliza ba ninia Governu no tenta atu taka deit ona,” Lu-Olo argumenta.

 Lu-Olo hatutan, loron ruma Tribunal mak sei julga fila fali kazu ne’e hodi responsabliza. “Hau repete fila fali katak, kualker dia Tribunal mak sei julga fila fali,” Lu-Olo afirma tan. 

Ba kestaun ne’e, antes nee mos, Xefi bancada FRETILIN, Aniceto Guterres liu husi deklarasaun politika iha PN, hato’o FRETILIN nia preokupasaun boot ba erru ne’ebe IV Governu halo iha kontratu ho Kompania Lifes Enginering.

.

Lere Anan Timor: “Governu Tenki Simu Portu Hera Ho Kualidade”

.

Jornal Timor Post - Sesta-feira, 12 Outubru 2012 

Xefe Estadu Maior FALINTIL-Forsa Defesa Timor Leste (F-FDTL), Maijor Jeneral Lere Anan Timor, husu ba Governu atu simu portu Hera ho Kualidade. 

“Hau husu ba Governu tenki simu portu ne’e ho kualidade,” deklara Lere iha Kuartel Jeral F-FDTL, Fatu-hada, Dili, Kinta (11/10). 

 Lere hateten, nia parte la iha intervensaun ba konstrusaun portu Hera no laiha responsablidade ba obra ne’e, nia parte so hatene simu Portu Hera ho kualidade ne’ebe diak. Iha parte seluk, Prezidenti Konsellu Diretivu Lifese Pty Ltd, Jhon Down, hatete, komapania hakarak hari’i portu iha fatin ne’ebe propiadu, maibe komando husi Komponente Naval rasik mak la fo autorizasaun ba kompania atu halo portu iha fatin ne’ebe propoiu. 

Jhon Dwon mos esplika katak, wainhira kompania simu orden atu halo konstrusaun ba Portu naval hera, sira aviza ba komandante komponenete Naval katak, sira tenki haruka ke’e rai-henek iha area tasi-ibun neebe besik ponte, tanba se la’e bele estraga portu ne’e rasik. 

 Entertantu, Sekretariu Estadu Defesa (SED) Julio Thomas Pinto hatete, Portu naval hera ne’e responsablidade kompanai Lifese tanba Portu ne’e seidauk intrega ba governu. 

Nune’e mos Julio Thomas rekoinese katak, maske antes ne’e sira iha konkordansia diak, durante konstrusaun lao, Lifese kestiaona duni kona ba rai-henek ne’ebe nakonu iha portu okos, maibe laiha karta eskrita ofisial ida husi lifese ba governu.

.

“PN Ameasa La Aprova Orsamentu Ba SED”

.

Jornal Timor Post - Kinta-feira, 27 Setembru 2012 

Parlamentu Nasional (PN) ameasa sei la aprova tan orsamentu iha orsamentu retifikativu ba Sekretariu Estadu Defeza (SED) hodi selu kompania Laifes, tanba kompania ne’e failla ona halao konstrusaun ba Portu Naval Hera. 

Prezidenti Komisaun B ne’ebe trata ba asuntu Defesa no Seguransa iha PN, Maria Lurdes Martins afirma kestaun ne’e, relasiona ho SED rasik ne’ebe propoin tan orsamentu hamutuk Milaun U$1.1 iha orsamentu retifikativu atu selu kompania Lifes. Kuarta-feira (26/9), hafoin audensia ho Sekretariu Estadu Defesa, Julio Tomas Pinto, iha salaun Komisaun B, Maria afirma, nia parte presiza hetan esplikasaun diak liu tan husi SED rasik no Ajensia Dezenvolvimentu Nasional (ADN) kona ba kestaun ne’e. 

 “Ami sei bolu ADN mai iha ne’e (Komisaun B PN) atu halo justifikasaun klean liu tan, karik la iha klarifikasaun, komisaun B propoin para labele aprova, tanba osan ne’e ita nian hotu,” hateten Maria. 

Nia haktuir, konstrusaun ba Portu Naval Hera, Governu selu tiha ona Miloens U$7 resin ba kompania Laifes husi Australia ne’e no tuir kontratu ho Governu sei hela duni osan restu hodi kompleta miloens U$8.9 maibe tamba Porto ne’e to’o agora seidauk uza no tohar tiha ona, tanba ne’e, nia parte preokupa tebes ho orsamentu ne’ebe SED propoin tan iha orsamentu retifikativu. 

Entertantu, iha fatin hanesan, SED Julio Tomas Pinto, esplika, total orsamentu ne’ebe nia parte propoin atu selu duni kompania Laifes hodi kompleta osan restu ne’ebe sei iha governu tuir kontratu, maibe nia dehan, mekanismu selu ne’e konforme rejultadu pozitivu husi kontinuasaun konstrusaun ne’ebe kompania ne’e sei halao. 

.

Ponte Portu Hera Toar: "BTK Halo Konstrusaun"

.

Jornal Timor Post - Kuarta-feira, 05 Setembru 2012

Atu proteze portu komponente naval Hera, Governu indika ona Kompania BTK hodi halo Konstrusaun Kebra Mar ba portu komponente naval.

Konstrusaun Kebra Mar ba Portu Komponente Naval ne'e, gasta orsamentu 3 Miloens no tuir planu konstrusaun ne'e sei finaliza iha tinan ne'e.

"Portu Provizoriu oras ne'e at hela, no foin dadauk ne'e Governu haruka ona kompania BTK ba halo konstrusaun Kebra Mar ba Portu Hera," Informa Major jeneral F-FDTL Lere Anan Timor ba Jornalista sira iha kuartel Jeneral, fatuhada, Dili, foin lalais ne'e.

konstrusaun Kebra mar ne'e ho luan metru 250, komprememntu metru 24, komdisaun ne'e bele ona asegura Portu Komponente naval.

Lere Anan Timor mos esplika katak, oras ne'e dadaun ro komponente Naval sei para hela iha Portu Dili, tanba kondisaun Portu Hera seidauk diak.

.

Portu Naval Hera Fo Esperensia Aat: “Lere Ezije Governu Sosa Elikoptru Tenke Ho Kondisaun”

.

Jornal Independente - Tersa-feira, 04 Setembru 2012

Komandante FALINTIL-Forsa defeza Timor Leste (F-FDTL) Major Jeneral Lere Anan Timur Ezije Governu atu kria uluk kondisaun molok sosa elikoptru.

Ezijensia Lere ne'e relasiona ho esperensia aat ne'ebe sira hasoru tiha ona iha prosesu konstrusaun Portu Hera ba Ro Naval ne'ebe toó ohin loron sei abandona tanba laiha kondisaun.

Tuir planu Governu sei sosa elikoptru ba F-FDTL tanba iha tempu besik F-FDTL sei iha Forsa Aero.

Lere dehan, importante tebes atu kria uluk kondisaun hanesan, prepara pilotu, mekaniku inklui ofisina, Aero Portu ba F-FDTL molok sosa elikoptru.

"Sira (Governu) sosa ne'e laos defisil, sosa ne'e fasil, maibe ita atu kria kondisaun atu simu aviaun sira ne'e mak problema tenki prepara ita nia pilotu, mekaniku buat sira ne'e hotu," dehan lere foin lalais ne'e iha Kuartel F-FDTL Fatuhada, Dili.

Nune'e mos Lere afirma tan katak, Portu Dili ezizi ba F-FDTL atu retira lalais ro Naval ne'ebe oras ne'e sadere iha Portu ne'eba ba fatin seluk tanba difikulta atividade portu nian.

"Portu difikulta tebes ba ami, tanba ne'e halo ami nia ro tenke para iha Portu Dili, halo portu nain ibun boot katak, tenki retira lalais, tanba ro tama hatuun sasan la diak," dehan Maijor Lere.

Nune'e, maijor Jeneral husu orjenti ba Governu atu hasia lalais kondisaun Portu Naval Hera atu labele difikulta servisu F-FDTL nian.

"Hau nia hakarak Ponte tenki iha, tamba ponte tohar ona, imi (Governu) tenki troka ho kualidade, atu governu ka kompania mak responsabliza ami nia hakarak tenki troka," tenik maijen ne'e.

Lere Mos husu atu Governu tenki kria planu diak ba kualker projeitu atu nune'e bainhira gastu orsamentu povu nian bele gastu ho diak atu fo benefisiu ba povu.

.