“PN Ameasa La Aprova Orsamentu Ba SED”

.

Jornal Timor Post - Kinta-feira, 27 Setembru 2012 

Parlamentu Nasional (PN) ameasa sei la aprova tan orsamentu iha orsamentu retifikativu ba Sekretariu Estadu Defeza (SED) hodi selu kompania Laifes, tanba kompania ne’e failla ona halao konstrusaun ba Portu Naval Hera. 

Prezidenti Komisaun B ne’ebe trata ba asuntu Defesa no Seguransa iha PN, Maria Lurdes Martins afirma kestaun ne’e, relasiona ho SED rasik ne’ebe propoin tan orsamentu hamutuk Milaun U$1.1 iha orsamentu retifikativu atu selu kompania Lifes. Kuarta-feira (26/9), hafoin audensia ho Sekretariu Estadu Defesa, Julio Tomas Pinto, iha salaun Komisaun B, Maria afirma, nia parte presiza hetan esplikasaun diak liu tan husi SED rasik no Ajensia Dezenvolvimentu Nasional (ADN) kona ba kestaun ne’e. 

 “Ami sei bolu ADN mai iha ne’e (Komisaun B PN) atu halo justifikasaun klean liu tan, karik la iha klarifikasaun, komisaun B propoin para labele aprova, tanba osan ne’e ita nian hotu,” hateten Maria. 

Nia haktuir, konstrusaun ba Portu Naval Hera, Governu selu tiha ona Miloens U$7 resin ba kompania Laifes husi Australia ne’e no tuir kontratu ho Governu sei hela duni osan restu hodi kompleta miloens U$8.9 maibe tamba Porto ne’e to’o agora seidauk uza no tohar tiha ona, tanba ne’e, nia parte preokupa tebes ho orsamentu ne’ebe SED propoin tan iha orsamentu retifikativu. 

Entertantu, iha fatin hanesan, SED Julio Tomas Pinto, esplika, total orsamentu ne’ebe nia parte propoin atu selu duni kompania Laifes hodi kompleta osan restu ne’ebe sei iha governu tuir kontratu, maibe nia dehan, mekanismu selu ne’e konforme rejultadu pozitivu husi kontinuasaun konstrusaun ne’ebe kompania ne’e sei halao. 

.

"PN Konsidera PNTL Sosa Kilat Ilegal"

.

Jornal Independente - Kinta-feira, 13 Setembru 2012

Parlamentu Nasional (PN) konsidera kilat ne'ebe mak Polisia Nasional Timor Leste (PNTL) sosa husi Indoenzia 'Ilegal' komisaun B PN, asuntu seguransa no defeza mos laiha koinesementu ruma kona-ba prosesu importasaun kilat ne'e.

Prezidenti Komisaun B PN, Lurdes Mbessa hateten, Parlamentu sei kestiona kona-ba prosesu sosa kilat iha diskusaun programa Kintu Governu Konstitusional nian, prosesu ne'e la taransparante ba ema hotu inklui mos membru Parlamentu sira.

"Atu bolu sekretariu Estadu Seguransa no Komandante Polisia atu halo audensia iha Komisaun B hodi deskute espesifiku liu tan antes aprova orsamentu Jeral ba tinan 2013," dehan nia, iha uma fukun PN (12/9).

Audensia publiku ne'e, tuir nia, atu hatene montante orsamentu hira mak aloka ba sosa kilat foun ba PNTL no orsamentu ne'e mai husi ne'ebe.

Nune'e, Komisaun B PN mos komesa buka tuir ona prosesu promosaun diviza ba PNTL, tanba deskonfia mosu problema, maibe, kestaun ne'e esklaresidu ona ho esplika husi komisaun Promosaun Diviza.

Ba kestaun sosa kilta ne'e, antes ne'e tuir Diretur ezekutivu Fundasaun Mahein (FM), Nelson belo hateten, tuir lolos prosesu kilat ne'e labele fo ba polisia mak hola rasik, maibe lolos governu mak tenki hola, tanba, prosesu ne'ebe mak formal husi instituisaun soberanu sira iha rai laran.

.

"Eis Prezidenti PN 'Lu-Olo no La Sama' Fo Seminar Ba Membru Parlamentu Nasional"

.

Jornal Nacional Diario - Kuarta-feira, 12 Setembru 2012

Eis Prezidenti Parlamentu Nasional (PN) iha primeira Leguslatura, Francisco Guterres 'Lu-Olo' no eis Prejidenti II Lejislatura Fernando La sama de Araujo realiza seminar ida ba membru Parlamentu Nasional sira.

Objetivu husi seminar ne'e mak fahe esperensia ba membru deputado foun sira kona ba funsaun deputado ninian.

Primeiru Vice Prezidenti Parlamentu Nasional Adriano do Nascimento hateten, iha seminar ne'e eis Prezidenti parlamentu nasional nain rua ne'e koalia liu kona ba kompetencia Prezidenti PN no Kompetensia meza i iha asuntu seluk mos sira sei koalia kona ba mandatu, dever ho diretu deputadu nian.

"Ita hatene sira nain rua hanesan eis Prezidenti Parlamentu nasional, ne'e duni sira iha esperensia barak kona ba servisu PN," dehan Aderito ba Jornalista sira, Tersa (11/9) iha uma fukun PN.

Nia esplika, husi seminar ne'e mos bele loke deputadu foun sira nia hanoin kona ba lalaok servisu deputado nian, tanba iha deputado foun barak mak maioria seidauk hatene lolos funsaun deputado nian.

.

Mandatu PN II Lejislatura Remata: "Kareta MP Pajero Lelaun US$9000"

.

Jornal Nacional Diario - Kuarta-feira, 12 Setembru 2012

Kareta membru Parlamentu Nasional (PN) segundo Lejislatura nian ho merek Pajero nebe fahe ba deputadu sira ne'e, Parlamentu Nasional sei fo lelaun ba deputado segundu lejislatura rasik ho folin US$9000.

Informasaun ne'e hato'o husi eis membru Parlamentu Nasional segundo Lejislatura ida ne'ebe JNDiario lokohi publika nia naran foin lalais ne'e iha nia rejidensia Fatuhada, Dili.

"Kareta ne'e uja tinan lima ona maibe lelaun ba ami karun la halimar," dehan deputado ne'e.

Wainhira JNDiarion konfirma ba meja PN, segundu lejislatura nian, nia dehan sei halo lelaun tuir fase tolu.

Konsellu Administrasaun sei tau kriteria tolu mak hanesan, Primeiru, fo Prioridade ba sira nebe mak uluk uza kareta ne'e, segundu, karik sira lakohi bele transfere fali ba deputado III lejislatura, no terceiro, bele loke lelaun ba funsionariu parlamentu nian, maibe karik sira mos lakohi bele loke ba publiku.

"Fase hirak ne'e tuir ona ita nia lei organiku iha PN nebe mak publika ona iha Jornal Republika, agora prosesu lelaun kareta ne'e tama ona ba fase tekniku nian no prepara ona atu halo lelaun," dehan Segundu Vice Prezidenti PN Aderito Hugo, Tersa (11/9) iha uma fukun PN.

Nia esplika, ba deputado ne'ebe re-eleitu fali ne'e, sira mos iha diretu hanesan ho deputado ne'ebe la-eleit, tanba tuir definisaun conselhu administrasaun nian hateten ona, deputado re-eleitu no la re-eleitu iha diretu hanesan atu halo lelaun ba kareta MP nian ho no matrikula 88.

.

Meza Parlamentu Nasional Kontenti: "Opozisaun FRETILIN Aseita Simu Kareta PRADO"

.

Jornal Nacional Diario - Kuarta-feira, 05 Setembru 2012

Iha II Legislatura (2007-2012) Bancada FRETILIN iha Parlamentu Nasional rezeita simu kareta MP-88 tanba konsidera Governu Aliansa Maioria parlamentar (AMP) 'defakto', maibe, iha terseira legislatura neé, Bancada FRETILIN sei simu kareta atu fasilita membru Parlamentu nasional hotu nia atividade legislasaun.

Ba kestaun ne'e, Vice Prezidenti PN, Aderito Hugo da Costa dehan, iha III Legislatura ne'e bancada FRETILIN simu kareta PN tamba kareta ne'ebe PN oferese ne'e nuudar Patrimonia estadu laos patrimonia politika.

"Defaktu agora FRETILIN rekoinese katak, kareta ne'ebe mak uluk sira la simu husi II Legislatura laos reprezetante husi partidu, maibe ne'e husi estadu, ne'e mak iha III Legislatura bainhira FRETILIN disidi simu kareta PN, ne'e hanesan kontenti mai meza PN iha III legislatura," afirma Aderito Hugo iha uma fukun PN TErsa (04/9).

Aderito Hugo mos promete atu iha futuru, meza PN III Legislatura sei haree atu nune'e bainhira deputadu foun simu pose, simu kedas mos xave kareta nian, duque hanesan agora dadaun orsamentu aloka tiha ona hodi hola kareta, maibe toó oras ne'e dadaun kareta seidauk toó deputadu sira nia liman, tanba demora iha aprovizionamentu.

.