Entervista Esklusivu ho Sekjen Partidu FRETILIN, Mari Alkatiri “FRETILIN Laos Ona Partido Opozisaun”

.

Jornal Nacional Diario - Kinta-feira, 05 Dezembru 2013

Sekretariu Jeral (Sekjer) Partidu FRETILIN, Dr. Mari Alkatiri deklara, FRETILIN agora laos ona partidu opozisaun, maibe partidu de intervensaun, tanba hakarak interven kuandu Governu lao naksalak FRETILIN intervein kedan para bele hadia kedas labele husik liu.

 “FRETILIN laos opozisaun, FRETILIN Partidu de intervensaun, interven kuandu Governu sala interven kritika, mas interven mos para hadia ita tenki interven,” Sekjer Partidu FRETILIN, Mari Alkatiri deklara asuntu ne’e ba JN-Diario foin lalais ne’e iha ninia knar fatin Timor Plaza Dili.

 Nia hatutan liu tan katak konseitu FRETILIN partidu de intervensaun ne’e, tanba kuandu la intervein agora kedan ba buat ne’ebe mak Governu halo mak la intervein sei fo impkatu ba ukun nain sira ne’ebe mak ukun rai ne’e iha futuru mai.

 “Tanba ne’e se FRETILIN la interven ba tinan lima (5) tan aban bain rua rai ne’e lao sala dalan tiha ona, se mak mai ukun ne’e susar tebe-tebes atu hadia, ita kontinua hakilar deit-hakilar deit la interven para konsege hetan dalan ida que diak para atu hadia hamutuk ho Governu ou Primeiru Ministru, entaun aban bain rua que rai ne’e aat liu ona, que sira ne’ebe servisu ho Primeiru Ministru ne’e barak liu mak lahatene saida mak sira halo,” afirma eis Primeiru Ministru iha Primeiru Governu Konstitusional ne’e.

Aktual kordenador no Zona ekonomia Espesial oecuse ne’e komenta, partidu de intervensaun ne’e intervein kedan para hadia ka halo kedan mudansa.

 “Partidu de intervensaun ne’e Forsa liu de partidu opozisaun, opozisaun ne’e hatene de’it hakilar, heind deit eleisaun, intervensaun ne’e intervein agora duni para atu halo mudansa,” komenta nia.

Sekretario Jeral Partido FRETILIN ne’e sublinha liu tan katak, iha Timor so partidu FRETILIN mak iha abun no hun, laiha partidu seluk, tantu ema sira ne’ebe mak halai tuir Primeiru Ministru (PM) Kay Rala Xanana Gusmao ne’e tanba hakarak hetan kargu.

 “Partidu ida ne’ebe que iha abut no iha hun mak FRETILIN laiha tan seluk, sira seluk ne’e tanba buka hakarak atu sai Ministru lalais ne’e mak halai ba tabele tiha maun Xanana,” dehan Alkatiri.

.