Antero Henrique Mate, “Deskonfia Oknum PNTL Involve”

.

Jornal Nacional Diario - Tersa-feira, 03 Dezembru 2013 

Komunidade iha kapital Dili, foin mak akompania informasaun kona ba mate homesidu ida ne’ebe mak akontese iha 28 Novembru 2013, iha area Santa Cruz, maibe nutisia seidauk malirin iha povu nia tilun, akontese fali oho malu tan neebe akontese iha area beto, Suku Comoro. 

Kazu Homesidu ne’ebe akontese Domingu Madrugada ne’e, mais ou menus iha tuku 05:00 OTL ne’ebe deskonfia asaun planeadu no deskonfia mos envolve oknum Polisia Nasional Timor Leste (PNTL) balun, ne’ebe ikus mai Joven ida ho naran Antero Henrique Lopes (22) istimadu Yanto ne’e mate iha area Beto ninian iha Valeta kuak. 

Nune’e, Ernesto de jesus Maya nuudar familia matebian hateten, deskonfia asaun ne’e planeadu no organizadu ne’ebe involve mos xefe Aldeia ho oknum Polisia FM, tanba ne’e mak sira tenta subar faktus. 

“Ho evidensia hirak ne’e ami familia la kontenti tanba saida mak informasaun xefi Aldeia AP ho oknum Polisia FM hatene hela suspeitu nain 12 subar hela iha oknum Polisia FM nia uma maibe, tanba saida polisia sira to’o antes ona la kaptura, no hein fali Polisia Militar (PM) , ida ne’e hatudu katak, polisia sira mos hala’o servisu la netral hodi proteze no defende povu kiik iha nasaun RDTL,” lia hirak ne’e hato’o husi Ernesto de Jesus Maya nuudar familia matebian, liu husi konferensia imprensa ba jornalista sira segunda (02/12)iha Aldeia Mate La hotu , Suku Komoro, Dili. 

 Nia argumenta, tuir informasaun ne’ebe antes husi xefe Aldeia Mate La Hotu hateten katak, akontesementu oho matebian Yanto iha fatin seluk mak tula ho motor mai soe iha xefe Aldeia nia uma oin. “Maibe realidade iha evidensia barak hatudu katak, matebian yanto Joven sira iha Aldeia Mate La Hotu maka oho duni, ho evidensia besi kanu, katana, tudik, ho sinelus hotu latan hela iha dalan atu tama ba xefi Aldeia mate la hotu nia uma ne’ebe nakonu mos ho ran,” nia hateten. 

Nia reforsa liu tan katak, evidensia (Xefi Aldeia dehan, red) matebian Yanto oho iha fatin seluk, maibe suspeitu nain 12 ne’e subar hela iha Oknum Polisia ho naran FM nia uma laran. Nia dehan, maske polisia to’o ona iha fatin akontesementu maibe Polisia la konsege kaptura suspeitu nain 12 ne’ebe subar hela iha oknum Polisia FM nia uma laran. 

Nune’e, familia matebian ejiji ba komandu PNTL, Ministeriu Publiku, PDHJ, atu halo investigasaun klean ba kazu ne’e, nune’e liu-liu ba Xefi Aldeia Mate La Hotu AP, oknum Polisia FM ho suspeitu nain 12 ne’e, hodi fo kastigo todan tuir lei ne’ebe vigora iha nasaun RDTL ne’e.

.