Jornal Independente - Kuarta-Feira, 11 Junu 2014
Prezidenti Parlamentu Nasional (PN), Vicente da Silva Guterres fo
hanoin ba Prokurador Jeral da Republika (PJR), Jose Ximenes atu halo
nia knaar no kompetensia ho nonook.
"Buat sira ne'e servisu propriu Ministeriu Publiku (MP) i Prokurador
Jeral Republika tanba hau husu atu halo nia servisu i nonook no nook
buka hetan akuza la'os hanesan ne'e publika iha televizaun, Radiu no
Jornal sira," dehan nia iha Parlamentu Nasional horsehik (10/6).
Prezidenti Parlamentu lamenta deklarasaun prokurador Jeral Republika
katak, identifika membru Governu balun envolve aktu krime korrupsaun
no mal-adiministrasaun.
Iha PJR nia deklarasaun mos hateten katak, kazu hamutuk sanulu resin
rua (12) ne'ebe hetan ona akuzasaun husi Ministeriu Publiku (MP), atu
halo prosesu julgamentu iha Tribunal Distritu Dili (TDD), tempu badak
nia laran.
Tuir Prezidente Vicente katak, se asuntu ne'e realmente katak Ministru
no sekretariu estadu balun iha uma no kareta BMW iha Indonezia ne'e
knaar no kompetensia Ministeriu Publiku nian atu halo investigasaun.
"Se Prokurador Jeral Republika haree ida ne'e hala'o sira nia knaar
mas iha asuntu sira ne'e tenki sijilu, respeitu aas direitu justisa
no ne'e importante tebes ita labele fase ema ka hatuun ema iha prasa
publiku," dehan nia iha PN horsehik.
"Tanba ema nia vida no ema nia dignidade muitu importante so depois
kondenadu mak ita dehan kondenadu," nia lamenta deklarasaun PJR.
Iha fatin hanesan, Vise Prezidenti Bancada FRETILIN, Francisco Miranda
Branco hateten, nia parte apoiu identifikasaun husi PJR atu kontinua
halo investigasaun tanba korrupsaun no mal-administrasaun fo impaktu
ba dezenvolvimentu.
"Ami husu atu Ministeriu Publiku kontinua halo investigasaun no buka
tuir Ministru no sekretariu estadu ne'ebe komete krime korrupsaun no
mal-administrasaun atu prosesa tuir justisa," nia sujere.
Entertantu, Vise Prezidenti Bancada PD, Adriano Joao hateten, Bankada
PD konkorda MP halo investigasaun hodi halo akuzasaun ba ministru no
Sekretariu estadu ne'ebe deskonfia komete korrupsaun no
mal-administrasaun.
"Ministru no Sekretariu Estadu halo uma iha Indonezia no kareta
presiza buka tuir no investiga ne'e uza sira nia osan rasik ka osan
estadu," nia sujere.
Iha loron 9 fulan-Junu Prokurador Jeral Republika (PJR) aviza ba
Ministru no sekretariu Estadu balun atu prepara aan didiak hodi hataan
sira nia hahalok ne'e iha Tribunal.
"La kleur tan Ministru no Sekretariu estadu balun prepara ona atu ba
tuir julgamentu," dehan Prokurador Jeral Jose Ximenes, bainhira loke
seminariu kona ba kontra korupsuan ho tema 'Prevenir no Repremir' iha
Delta Nova, Komoro foin lalais.
,
Sem comentários:
Enviar um comentário
Nota: só um membro deste blogue pode publicar um comentário.