"PR Taur Husu Joven Sira Labele Ukun Timor Ho "Bolsu"

.

Jornal Independente - Segunda-Feira, 16 Junu 2014 

Prezidente Republika (PR) Taur Matan Ruak apela ba lider foun sira hotu atu ukun nasaun ne'e tuir prinsipiu luta ba libertasaun povu nian, hodi tau sees kakutak osan hodi hamahar bolsu. 

Xefe Estadu hakarak tebes atu prepara joven sira hodi kaer ukun iha nasaun ne'e, maibe sai dezafiu boot, tanba durante ne'e diskursu (Wacana) iha publiku indika katak, foin sa'e barak nia kakutak "seidauk loos", hodi hanoin liu ba hariku sira nia aan husi aspetu hotu-hotu. 

 "Hau hakatak joven sira prepara imi nia aan para ukun, maibe kuandu imi ukun imi labele hanoin de'it ba imi nia aan, ba imi nia bolsu," dehan PR Taur bainhira partisipa iha serimonia aniversariu Partidu Demokratiku (PD), iha Likisa, Sabadu (14/6). 

Eis Komandante F-FDTL ne'e hateten, bainhira ukun nasaun importante liu mak sira ne'ebe uluk fo sira nia aan ba mate, husik hela faluk ho oan kian sira moris mesak to'o ohin loron, tanba, karik sira la mate, sira nia feri-koan no oan sira sei la moris iha susar no terus hanesan agora ne'e, tanba sira mos bele sustenta sira nia feen no oan sira. 

Ne'e duni, husu ba joven sira iha partidu demokratiku (PD) bainhira joven ka foin sa'e ida mak aban bain rua kaer ukun presiza tau importansia, liuliu ba iha feto faluk no oan kiak sira. Maski nune'e, presiza tau matan mos ba sira ne'ebe mak moris dook sira kontinua tau esperansa ba ukun nain sira ne'ebe hanesan aman. 

"Iha esperensia ne'e mak hau hakarak ajuda joven sira para bele hatene aprofunda imi nia konesimentu, kargu, valor no prinsipiu ne'ebe imi fiar, imi tau ida ne'e nu'udar funsaun ba imi nia nasaun", dehan nia. 

Nia hatutan, maski laiha buat ida atu agradese ba sira maibe hateten de'it katak, uluk terus hamutuk fakar raan ba ukun rasik aan, ne'e duni ohin tenki hamutuk fila fali hodi hikis kosar ba moris diak. 

 "Sira (Povu) sai terus no kiak tanba ita, sentimentu ida ke diferenti liu, uluk ita sei halo funu uluk ita bolu lider sira ne'e aman no maun (Pahlawan), ohin sira povu ita koalia la rona, ita la respeita, sira hadook aan liu, ita hasees ita nia aan liu," dehan Prezidenti Taur Matan Ruak.

Foto de, Presidência da República de Timor-Leste, Facebook.

.