Espouza Nelio Isaac Ba Halo Barulhu Iha SEKOMS La Sama: Presiza Berifika Lolos

.

Jornal Nacional Diário - Wednesday, June 25, 2014

Secretario Estado Komunikasaun Sosial (SEKOMS), Nelio Isaac Sarmento nia espouza, Melly Xavier, ho nia banin feto, inklui alin feto ida, Tersa (24/6), tuku 11:30 OTL, halo barulhu oituan iha Gabineti SEKOMS iha Palacio Governu, tanba deit deskunfia Nelio Isaac selingkuh ho nia sekretaria ho inisial DS.

Funsionariu lubun boot ida, inklui jornalista sira ne’ebé loron-loron nongkorong iha Palacio Governu, liu-liu iha Gabineti Primeiru Ministru (PM) hakfodak tebes ho akontesimentu ne’e. Ho nune’e, sira halai hakbesik ba hobur no haree situasaun ida ne’e.

Ho kosar maka’as no isin besi-ran manas, mana Melly ho nia inan no alin feto ida, hakat ho ain nakdedar tama borus ba iha Gabineti SEKOMS nian hodi buka tuir alin feto DS.

“O moe laiha, hasai tiha deit o, tanba matenek iha Timor ne’e barak la’os o mesak. Feto hanesan ne’e labele servisu iha Palácio Governu,” lia fuan ida ne’e hakilar husi mana Melly nia inan wainhira hakat ba atu rakut alin feto DS ne’ebé hala’o hela servisu estadu nian iha Gabineti SEKOMS.

Rona tiha lia hirak ne’e, alin feto DS ne’ebé SEKOMS rekruta nudar nomeasaun politika iha Gabineti SEKOMS ne’e, oin fila-an tiha no kosar lotuk sae. Ran atu halai sala koi-kois, tanba derepenti deit familia Nelio Isaac Sarmento nian halo atake ibun ba nia.

Nonok, nonok no hamri’ik iha fatin halo defeza de honra ba nia-an. Ne’e mak situasaun ne’ebé hatudu husi alin DS. Maske, Nelio Isaac nia espouza mana Melly ho nia inan no alin feto ne’e soe piadas manas iha tilun, maibé DS kalma hateke tuir sira nia jeitu.

“Ami mai halo hanesan ne’e ba nia para nia mo’e ka la’e, tanba ha’u pernah haruka sms hodi ha’u sama atensaun ba nia, ha’u dehan, o hakarak sai funsionáriu ne’ebé di’ak, o halot o nia-an didi’ak, ha’u lakohi o atu ba servisu atu sobu ha’u nia uma laran. Nia hatan dehan didi’ak, mas ternyata bosok ten kait ha’u nia laen tu’un sa’e,” mana Melly hateten ho ibun nakdedar.

Situasaun ne’e iha Gabineti SEKOMS ne’ebé klot no malirin tanba AC nia fresku nakfilak derepenti no manas hanesan besik iha ahi Purgatóriu nian. Manas liu tan, kuandu mana Melly hatudu liman hanesan fó sinal ba alin feto DS atu sukat nia-an no tau nia diginidade hanesan feto Timor (feto Maromak).

Tensaun iha Gabineti SEKOMS nian neneik no bei-beik kalma, wainhira Seguransa Sivil ne’ebé hala’o knar iha Palácio Governu mai kaer mana Melly nia liman lori sai tiha ba iha Palácio Governu nia tatis rohan.

Maske nune’e, mana Melly nia ibun lataka. 

Nia hakilar liu tan hodi lia tun dehan, “Ha’u ne’e tama legál, familia rua tuur hamutuk no kaben na’in. La’os hanesan nia (DS-red) mai tenta ema nia laen,”.

Iha fatin hanesan mana Melly nia inan mós lia tun dehan, “ami hatene-an katak fatin ne’e servisu nian, maibé ami lasimu kuandu fatin servisu ne’e halo fali fatin memadu kasih.

Situasaun komesa kalma wainhira mana Melly ho nia inan no alin feto ne’e hakat sai husi Palácio Governu hodi la’o husik hela DS ne’ebé hela ho moe no tauk boot. Tanba Nelio Isaac nia espouza ho familia sira ameasa fó presaun psikolojia maka’as no todan tebes.

Husi sorin seluk Vise Primeiru Ministru Fernando La Sama de Araújo lamenta tebes ho situasaun ne’e, tanba situasaun hanesan ne’e, lamerese atu akontese iha fatin públiku. Satan, repartisaun estadu nian hanesan Palácio do Governo. Maske nune’e, La Sama, tatoli ba jornalista sira atu buka verifika lolos lai situasaun ne’e .

“Ha’u hanoin buat ida deskonfia ne’e kan seidauk los, ne’ebé presiza atu berifika katak, buat ne’e los hanesan ne’e duni ka la’e, selingkuh duni ka la’e,” hateten La Sama hodi lia tun tan dehan, situasaun ne’e dala ruma ema balu bele lakontrola emosaun, rona buat ruma maske lalos, kuandu la konsege kontrola emosaun, buat sira hanesan ne’e bele akontese.

“Ha’u lakohi atu espaila lai buat ne’e katak faktus hanesan ne’e di’ak ka ladi’ak, husik buat ne’e prosesu la’o lai ba, kuandu iha faktus ita koalia ikus,” hateten La Sama.

To’o nutísia ne’e hatun, jornalista JN-Diário ne’e seidauk hetan konfirmasaun husi SEKOMS Nelio Izaac, basa nia laiha fatin servisu. ekipa JN-Diário

.