Ambisaun halo sulap Oe-cusse, sei la susesu

.

Foto, Jornal Nacional Diário

Jornal Nacional Diário- 19 de outubro de 2015

Diretur Ezekutivu Asian Justice And Right (AJAR), José Luis Oliveira hatete katak, ukun nain balu ne’ebé ambisaun atu halo sulap ba dezenvolvimentu iha Zona Espesial Ekonomia Sosial Merkadu (ZEESM) Oe-cusse, ne’e sei la susesu.

José Luis Oliveira esklarese, nia la fiar atu investementu bo’ot ZEESM ne’e, bele atrai investedor ba investe iha Oe-cusse, tanba   ukun nain sira nia ambisaun, halo povu sofre.

“Tanba de’it ambisaun naran bo’ot husi lider balun, hakarak iha tempu badak, atu halo sulap iha Oe-cusse atu sai hanesan, Batam ka Singapore, povu mak sai vítima,”katak José Luis ba jornalista sira iha nia kna’ar fatin Palapasu Dili, Sesta (16/10).

José Luis relata, Autoridade ZEESM Oe-cusse hasai povu ho forsa husi povu nia uma no nia rai rasik ne’e, nu’udar evidensia ida katak, povu mak sempre sai vítima ba dezenvolvimentu.

Nia dehan, tanba ambisaun ida ne’e mak, lider sira haluha tiha katak, dezenvolvimentu ne’e, tenke la’o tuir prosesu.

José Luis akresenta, dezenvolvimentu ne’e, la’os haree de’it ba dezenvolvimentu fiziku, maibé tenke haree dezenvolve mós povu.

“Sira dudu hotu povu Oe-cusse sai husi, aban bairua Oe-cusse ne’e sai kota hantu, tanba ha’u lafiar investementu ne’ebé ke ZEESM halo ne’e, sei atrai investor, ha’u la fiar,”relata José Luis.

Nia esplika, Zona Ekonomia ne’ebé mak agora dadauk dezenvolve iha Oe-cusse ne’e, sei la atrai investedor mai atu tama iha ne’eba, tanba Zona Ekonomia barak iha nasaun seluk mak falla to’o agora.

José Luis fó ezemplu katak, iha tinan hirak liu ba, iha Kupang Indonesia iha ambisaun ida kona-ba, atu hari’i Zona Ekonomia ida atu fasilita Darwin Singapore ho Kupang rasik, maibé ambisaun ne’e la susesu.

“Sa tan iha Oe-cusse, ha’u haree ida ne’e investementu ida ne’ebé bele sia-sia, sei ita hakarak ansi, ita la dezenvolve neneik hodi dezenvolve povu ho neneik, mak buat ne’e sei sia-sia,”tenik José Luis.

Nia dehan, agora dadauk ukun nain sira hakarak halo hotel estrelas, aeroportu internasionál, portu internasionál no hospital internasionál, maibé ema sei la ba uza to’o sasan sira ne’e sai at de’it.

José Luis dehan, kuandu buat hotu sai hanesan ne’e ona, entaun investementu investementu Estadu nian ba mehi bo’ot ida ne’e, sei la susesu, tanba ema lakohi atu ba investe iha ne’eba.cos

.