“Afonso Rejeita Deklarasaun Lere”

.

Jornal Independente - Kuarta-feira, 16 Outubru 2013

Adjuntu Komandante Jeral Polisia Nasional Timor Leste (PNTL), Komisariu Afonso de Jesus retira ninia deklarasaun kona ba ninia membru balun envolve iha krime organizadu ne’ebe foin lalais ne’e akontese iha kapital Dili.

 Antes ne’e, Komandante Jeral FALINTIL-Forca Defeza Timor Leste (F-FDTL), Lere Anan timur deklara katak, identifika ona membru PNTL balun mak envolve kazu ne’e, Adjuntu komandante PNTL, Afonso de Jesus mos rekonese duni iha membru balun ‘halimar’ iha krime ne’ebe mosu iha Dili laran.

Maski nune’e, Komisariu Afonso de Jesus dehan, foin lalais bolu ona komandante PNTL husi Distritu 13 hodi enkoraja sira, atu labele fiar ba rumoris ne’ebe durante ne’e espalla iha publiku nia let katak, membru PNTL balun envolve krime organizadu. Tuir nia deklarasaun, ne’ebe fo sai iha publiku bele enfluensia prestasaun servisu membru PNTL la masimu, tanba ne’e, komandante kontinua fo forsa moral ba membru sira atu kontinua servisu ho diak.

 “Komandante Distritu sira mai para fo hanoin ba sira atu nune’e fo tulun ba malu hodi hala’o kna’ar ne’e ho diak, ital abele ita hanoin deit ho deklarasaun sira ne’e ita dezmoraliza tiha hodi halo servisu ho diak,” dehan nia iha Akademia PNTL, Komoro, Segunda (14/10).

Nia hatutan, husu ba membru PNTL tomak atu servisu hamutuk rona malu nafatin lao tuir prinsipiu PNTL nian rasik, katak mantein lei no orden mak importante, se mak mete ba krime ne’e orsida liu husi investigasaun mak bele fo sai.

 Nia dehan tan katak, karik iha investigasaun mak hetan iha membru ruma envolve duni iha krime ruma, ne’e ema ida-idak nia responsablidade hodi ba hataan iha Tribunal, nune’e mos Ministeriu kompotente foti asaun ruma hodi bele kondena ema sira ne’e.

.