Jornal Nacional Diario - Kuarta-feira, 16 Outubru 2013
Komisaun Anti Korupsaun (KAK) segunda (14/10), aprezenta draft lei ida
ba governu, Draft ne’e atu regula servisu KAK nian, durante KAK sei
eziste iha rai ida ne’e.
“Ami hato’o ona draft ida, kona-ba estatutu ba KAK, ne’e mak ami mai
hato’o ba Vice Primeiru Ministru, atu halo ajenda ba Konsellu Ministru
para debate kona ba ida ne’e,” informa Prezidenti KAK, Komisariu
Aderito de Jesus ba jornalista sira iha palacio do Governu.
Aderito de Jesus informa katak, lei kona ba KAK nian iha, maibe to’o
oras ne’e KAK seidauk konsege iha estatutu ida atu regula buat lubuk
ida iha KAK.
“Hau mai hasoru malu ho Vice Primeiru Ministru Fernando La Sama de
Araujo, liu-liu kona ba internal KAK, tanba ita hare KAK lao tinan
tolu ona, maibe ita hare ami nia fasilidade sei infrenta hela buat
balun,” afirma Aderito de Jesus.
Aderito de Jesus hatutan, estatutu ba KAK ne’e sei aprova liu husi
konselu Ministru, tanba ne’e mak KAK mai halo konsultasaun ho Governu.
Tuir Aderito de Jesus, Vice Primeiru Ministru mos fo atensaun boot ba
kestaun ida ne’e, no nia sei haree ajenda ruma iha Konsellu Ministru
para KAK bele aprejenta estatutu ne’e diak liu tan.
“Estatutu ne’e regula kona ba instituisaun, tanba estatutu KAK ne’e
la’os la’o iha tempo agora ne’e deit, maibe instituisaun ne’e tenki
lao ba oin nafatin,” tenik Aderito de Jesus.
Nia hatutan tan katak, Vice Primeiru Ministru dehan, sei buka tempu
atu KAK bele halo aprezentasaun iha konsellu Ministru.
.
Sem comentários:
Enviar um comentário
Nota: só um membro deste blogue pode publicar um comentário.