“Conoco Philips-Woodside Ameasa Hadau Osan Mina”

.

Jornal Timor Post - Tersa-feira, 09 Outubru 2012 

Kompania Conoco Philips ameasa hadau osan mina iha Banku Federal Amerika, kuandu Governu la re-imbolsu impostu ne’ebe kompania selu ona ba estadu Timor-Leste. 

 “Wainhira Governu la selu, ami sei hatama prosesu ida ba Banku Amerika hodi tahan osan mina nian iha banku Federal, entaun, orsamentu labele sai,” Advogadu kompania Chonoco Philips, Pedro Aparicio dehan ba Timor Post iha nia knaar fatin, Comoro, Segunda (08/10). 

 Nia informa, kompania husu ba Governu atu selu metade ba iresaun nasional impostu, tanba desizaun tinan 2009 to’o agora kompania de’it maka selu impostu ba estadu, no governu rasik lakohi kumpri nia dever tuir akordu ne’ebe asina antes ona. Advogado Conoco Philips hatutan tan katak, osan re-inbolsa ne’ebe kompania ezizi ba estadu Timor Leste ho montante U$ 44 miloens. 

 Advogado ne’e mos rezeita informasaun ne’ebe espaillha iha publiku katak, kompania nia dividas iha estadu ho montantes U$ 3 biloens, ne’e la loos, tuir nia, estadu maka iha dividas ho kompania boot liu kompara ho osan ne’ebe kompania deve ba estadu. 

 Nia haktuir, problema refere akontese tamba impostu Chonoco Philips, Tokyo no Santos iha diferensia ideia ho estadu Timor Leste sobre pagamentu ba impostu. 

 “Bazeia ba akordu ne’ebe halo husi Governu anterior katak, ba esplorasaun mina hotu iha Timor Gap, kustu ba esplorasaun no impostu fahe ba rua, katak, parte estadu eslu 50% no parte kompania selu 50%,” nia esplika. 

Entaun, nia sublina, signifika katak, parte rua iha dever atu selu kustu ba estadu, maibe realidade iha parte esplorasaun hatudu kompania de’it maka selu impostu no estadu Timor la selu tuir nia dever. 

“Estadu tenki selu impostu ne’e ba estadu rasik no dirasaun impostu nian katak, kompania Conoco Philips mos hatama no governu mos tenki hatama impostu ba estadu, kompania de’it maka selu impostu ho nia totalmente, entaun, kompania la satisfas maka lori prosesu ne’e ba tribunal, hodi husu estadu re-imbolsu fali osan ne’ebe kompania halo ona ba estadu,” Aparicio hatutan. 

Entertantu iha Tribunal Distrital Dili, sesaun sivil simu ona rejistu prosesu 28 husi kompania Conoco Philips ho Woodside mak hanesan prosesu numeru 70/sivil/2011/TDD, 71/sivil/2011/TDD. 

Autor maka kompania Tokyo Timor Sea Recourse PTY.Ltd hasoru Estadu Timor Leste, prosesu 72/sivil/2011/TDD, 73/sivil/2011/TDD, 74/sivil/2011/TDD, 75/sivil/2011/TDD, 76/sivil/2011/TDD, 78/sivil/2011/TDD, 79/sivil/2011/TDD, 80/sivil/2011/TDD, 81/sivil/2011/TDD, 82/sivil/2011/TDD, 83/sivil/2011/TDD.

 Autor husi Chonoco Philips hasoru estadu ho nia prosesu 109/sivil/2011/TDD,110/ivil/2011/TDD Autor husi kompania Prosafe Rigs Ltd hasoru estadu Timor Leste ho nia prosesu 02/sivil/2012/TDD. Kompania Minza Limited hasoru estadu, prosesu 16/sivil/2012/TDD, 17/sivil/2012/TDD, 18/sivil/2012/TDD. 

 Autor husi Kompania Chonoco Philips hasoru estadu Timor Leste, proses 39/sivil/2012/TDD, 40/sivil/2012/TDD, 41/sivil/2012/TDD, 42/sivil/2012/TDD, 43/sivil/2012/TDD, 44/sivil/2012/TDD. Autor Chonoco Philips hasoru Estadu TL, prosesu 65/sivil/2012/TDD. 

A Kompania Santos JPDA hasoru Estadu Timor Leste no ikus liu maka prosesu 68/sivil/2012/TDD autor maka kompania Santos Limite hasoru Estadu Timor Leste.

.