"FRETILIN Hakarak Ema CNRT Mak Troka PM Xanana"

.

Jornal Independente - Kinta-feira, 30 Janeiru 2014 

Partidu FRETILIN pronto atu kolabora no servisu hamutuk ho ema se deit mak atu substituisaun Xanana Gusmao ba kargu Primeiru Ministru, maibe, FRETILIN prefere atu ema bele mai husi partidu CNRT hodi bele hetan apoiu husi parte hotu. 

Vise Prezidenti Bancada FRETILIN, Francisco Miranda Branco hateten, FRETILIN konsidera nafatin desizaun husi Bloku Koligasaun nian hodi hili ema se deit mak atu sai primeiru Ministru hodi troka Xanana Gusmao. 

Maske nune'e, nia dehan, importante liu desizaun ne'ebe foti teke konsensual hodi halo konsultasaun ho partidu koligasaun sira hodi bele hetan apoiu masimu. 

"Ami sempre pronto atu bele fo apoiu... ne'ebe bele sai konsensual husi CNRT ninian hodi nune'e bele hetan apoiu husi parte hotu," dehan Branco foin lalais ne'e iha PN. 

Nia reafirma, antes ne'e, Sekretariu Jeral FRETILIN, Mari Alkatiri hateten ona, se mak troka Xanana, ne'e hanesan kompetensia tomak, maibe CNRT hanesan partidu ne'ebe maioria iha PN, tenke prepara membru ida hodi assume kargu ne'e bainhira Xanana rezigna an. "FRETILIN la defende Xanana atu labele rezigna-an, maibe agora daudaun ne'e hanesan tempu tranzisaun ba jerasuan foun tenke prepara aan," dehan nia. 

Nia hatutan, hanesan jerasaun tuan entrega kargu ba jerasaun foun, maibe ba jerasaun tuan se la husik no sei kontrlolu ba jerasaun foun nia servisu, hodi nune'e bele ajuda tanba TL hanesan nasaun neebe sei nurak no presiza apoiu malu. 

Entertantu, konaba rezignasaun Primeiru Ministru Xanana Gusmao nian ne'ebe hadia hafoin diriji Simeria Komunidade pais Lian Portugues (CPLP), mambru Bancada PD, Paulino Monteiro hateten, normal tanba iha hanoin no estratejia ne'ebe diak no pozitivu ba dezenvolvimentu nasaun nian. 

Maibe, nia dehan tan, importante liu mak jerasaun foun ne'ebe atu kaer pasta PM presiza kria situasaun ne'ebe diak, labele han malu no tenke hakuak no hadomi povu TL tomak.

.