“Lekirauk Tama Edifisiu Parlamentu”

.

Jornal Nacional Diario - Tersa-feira, 07 Janeiru 2013 

Parlamentu Nasional (PN) hirus sekretariu Estadu meiu Ambiente (SEMA), tanba la tau matan ba lekirauk hat (4) nebe tama iha area PN hodi estraga infraestrutura iha PN. 

“Lekirauk iha ita nia parlamentu ne’e hau hanoin lekirauk sei mai iha ne’e atu fo hanoin ba ita no fo hanoin ba Sr. SEMA atu nia haree tok programa ruma ba ne’e, tamba ne’e Sr. SEMA nia funsaun konaba fauna ne’e atu halo oinsa bele proteje animal sira ne’e, oinsa maibe Lekirauk pasiar iha ne’e ita atu sai hanesan tiha deit dala ruma, ita ho lekirauk sai hanesan tiha deit,” Deputada Josefa Pereira husi Bancada FRETILIN deklara asuntu ne’e iha plenaria Segunda (6/1) horseik. 

Nia hatutan tuir lolos ne’e SEMA tau atensaun ba asuntu ne’e, tanba funsaun SEMA konaba fauna oinsa atu proteje animal sira ne’ebe lao lemo-lemo iha fatin publiku iha pior liu kuandu tama PN ne’e hanesan moe bot ida ba nia. 

 “Orsida ema barak dehan lekirauk mai iha PN tamba Lekirauk iha PN barak liu, hau buat sira hanesan ne’e hau mak moe fila fali deit, tanba ne’e hau husu ba SEMA ninian funsaun hodi haree oinsa atu proteje animal sira ne’e no oinsa atu bele tau iha ninia fatin,” hateten Deputadu Josefa. 

 Iha fatin hanesan Deputada Fernanda Lay mos la konkorda wainhira Lekirauk tama area PN hodi estraga infraestrutura PN nian, tanba ne’e nia husu ba Ministeriu kompotente atu tau matan ba Lekirauk ne’e hodi halo oinsa bele ba tau iha nia fatin para labele estraga sasan iha PN laran. Tuir Observasaun JN-Diario nota katak, iha Lekirauk boot rua (2) mak PN laran ne’ebe hala’i mai husi Halehun Tasi Ibun Palacio nian oin hodi tama ba iha PN kuaze fulan ida ona iha PN laran, maibe SAME rasik la hare buat hirak ne’e. 

Lekirauk ne’e wainhira funsionariu halimar hodi abuza, sira bele duni funsionariu no hatauk deputadu sira wainhira atu sa’e kareta maibe, dala ruma lekirauk mos siak ona iha PN laran bele halo foer no estraga infraestrutura iha sala komisaun nia sorin ou sala Partidu ninian. 

.