“Xanana Fo Konfiansa Tomak Ba Alkatiri”

.

Jornal Independente - Segunda-feira, 13 Janeiru 2013

Primeiru Ministru (PM) Xanana Gusmao fo Fiar ba eis Primeiru Ministru Dr. Mari Alkatiri atu transforma Distritu oecusse sai sidade ho padraun internasional ne’ebe diak liu iha reijaun Autonomu Oecusse, liliu planu master Plan Zona ekonomia.

 PM xanana hateten, iha OJE 2014 husi fundus infraestrutura hamutuk tokon U$20,9 ne’ebe sei aloka ba dezenvolvimentu Zona Ekonomia Especial Oekuse ne’ebe lidera husi Mari Alkatiri.

 “Ita hotu hatene, sei benefisia ho kriasaun iha tinan ne’e Zona Ekonomia Espesial ida, inisiativa mos, ne’ebe lidera husi Mari Alkatiri, atu transforma paizazen ekonomika, social no kultura, ita nia enclave nian, ho esforsu ne’ebe nesesariu tebes atu hakbesik ba oecuse ba kresimentu ne’ebe halao iha restu nasaun,” dehan PM Xanana liu husi diskusaun OJE 2014, iha PN, Sesta (10/01).

Tuir Xanana, planu Zona ekonomia Espesial oecusse ne’e mos atu kria kondisaun ka redusaun iha investimentu ba infraestrutura premite kompensa orsamentu ne’ebe preve, liuliu iha seitor tradisaun hanesan agrikultor no peska.

Nune’e Xefe Governu afirma, Planu master Plan Oekuse ne’e atu muda Distritu oecuse sai kapital ne’ebe nakonu ambiente furak, kria kampu fatin servisu, no osan sirkula iha rai laran deit. Iha fatin hanesan Dr. Mari Alkatiri hatete, nia parte halo lobi ona, ne’ebe investidor husi rai barak hakarak mai investe iha Zona Ekonomia Espesial oecusse, maibe lei seidauk iha atu regula.

“Hau hanesan akademiku ida ne’ebe halo lobi deit investidor barak ona husi nasaun barak, maibe seidauk iha regulamentu ida,” dehan Mari. Tuir Alkatiri, nia parte sei halo planu no dezenu inklui halo lobi ba investidor sira, maibe iha esperansa boot ona katak sei kria kampu servisu ba Timor oan tomak.

“Hau fiar katak, Lospalos oan mos sei ba serviso iha oekusse hodi minimiza dezempregu iha rai laran. Nia hatutan, rekursu umanu atu maneja planu ne’e preparadu ona inklui investidor barak mak hakarak investe iha Zona Ekonomia ne’e, maibe falta Governu kria lei ou regulamentu.

.