Xanana Rezigna An Estrutura V Governu Ameasadu; "PM Foun Ho Estrutura Governu Foun"

.

Jornal Nacional Diario - Kinta-feira, 30 Janeiru 2014 

Vice Prezidenti Parlamentu Nasional (PN) Aderito Hugo da Costa hateten katak, tuir regras Konstituisaun RDTL, kuandu Primeiru Ministru (PM) rezigna an, V Governu ho estrutura tomak nia mandatu mos termina, no PM foun nomeia, nia sei forma estrutura membru Governu foun, nune'e mos Partidu Conselho Nacional da Rezistensia de Timor (CNRT) bele sai fali opozisaun. 

"Agora Governu foun ne'e mosu hanesan hodi kontinua mandatu Governu bloku Koligasaun nian to'o 2017 ou mosu bloku Governu foun mos bele akontese," informa Aderito Hugo da Costa ba Jornal sira iha uma fukun Parlamentu Nasional (PN) Kuarta (29/01). 

Tanba ne'e tuir Aderito da Costa, wainhira PM Kay Rala Xanana Gusmao rezigna-an, automatikamente estrutura V Governu mos ameasadu dissolve, tanba estrutura Governu ne'e hamriik ho konfiansa husi Primeiru Ministru. Aderito da Costa hateten, tuir regras normal ne'ebe akontese iha rai hotu katak, kuandu Primeiru Ministru rezigna-an otomatikamente estrutura Governu sei paradu. 

"Primeiru Ministru rezigna-an otomatikamente ninia estrutura governu ne'e dissolve, ne'e normal ne'ebe akontese iha fatin hotu-hotu tanba kuandu Primeiru Ministru rezigna-an nia gabinete ne'e hotu tenki aprezenta fali gabinete foun," Aderito da Costa akresenta. 

Nia dehan, depende ba tempu Primeiru Ministru rezigna-an ne'e Prezidenti Republika bolu fali partidu Vensedor atu husu katak partidu vensedor bele kontinua mandatu ho kompozisaun estrutura governu ne'ebe harii iha 2012 to'o tinan 2017 ka modelu bloku governasaun foun. 

 "Bele mos akontese CNRT ba fali opozisaun tanba laiha dalan Primeiru Ministru Rezigna-an, Vise Primeiru Ministru assume kargu tanba primeiru Ministru rezigna-an gabinete ne'e 'bubar'," dehan Aderito Hugo.

 Aderito esplika tan katak, kondisaun ne'ebe akontese iha 2006 no agora iha 2014 ne'e situasaun ne'ebe la hanesan. 

"Situasaun agora ne'e Primeiru Ministru Xanana hakarak rezigna-an ho situasaun estavel ho funsionamentu estadu diak tebes neebe laiha kondisaun emerjensia no laiha krize iha setor saida deit estadu nian," katak Aderito da Costa. 

Aderito da Costa fundamenta katak, difinisaun konstituisaun RDTL klaru tebes, se Primeiru Ministru rezigna-an tenke iha Primeiru Ministru foun tuir regras presiza eleisaun antisipada iha periodu tranzisaun fulan nen (6) atu halo preparasaun ba eleisaun antisipada. 

"Mas ita haree esperensia iha tinan 2006 laiha eleisaun antisipada, tanba Prezidenti Republika iha kompetensia atu husu partidu maioria aprezenta figura hodi kontinua mandatu governu nian," Aderito dehan tan. 

Tuir Aderito da Costa, mudansa sira hanesan ne'e akontese ona iha krizi 2006 ne'ebe obriga Prezidenti Republika husu Primeiru Ministru Mari Alkatiri rezigna-an no husu ba Partidu Maioria atu aprezenta naran ida atu sai Primeiru Ministru hodi kontinua mandatu governu to'o 2007. 

"Mas akontesementu iha 2006 nee ita bolu extra konstitusional katak halo buat ida for a husi konstitusional ho consensus deit," nia informa.

.