Seidauk Tempu Ba Milisia Pro-Indonesia Fila Mai TL

.

Jornal Nacional Diário - Tuesday, April 15, 2014

Prezidente Repúblika (PR), Taur Matan Ruak, fo sai ba públiku katak, oras ne’e dadauk Estadu Timor-Leste seidauk bele simu milisia pro-Indonesia 1999 ne’ebé mak hakarak fila mai Timor-Leste tanba problema barak mak presiza Estadu ida ne’e rezolve uluk lai.

“Prezidente Republika dehan sei haree kondisoens ne’ebé  maka iha tamba  veteranus hotu, ema hotu seidauk fasilita, halo nusa maka sira (milisia) maka uluk fali ne’ebé sei haree didiak buat ne’e,”haktuir Veteranu, Ernesto Fernandes alias “Dudu” ba jornalista sira iha Palacio Prezidensial Aitarak Laran Dili, Segunda (14/04), hafoin informa milisia no povu autonimia sira nian hakarak fila mai TL tanba iha Indonesia moris ladiak ona.

Milisia pro-Indonesia halai ba Indonesia iha tinan 1999 tanba referendum ne’ebé mak ONU halao iha Timor-Leste maioria populasaun hili independensia katak hasees an husi Indonesia, nune’e milisia pro-Indonesia la satisfeitu ho rezultadu refere, sira sai ba Indonesia hodi sunu motuk no estraga hotu sasan ne’ebé mak iha sai ahu kdesan. Tanba ne’e iha milisia balun tama iha krime seriu, entaun buat sira ne’e hotu presiza tetu ho matenek.

 Veteranus ne’e hateten antes ne’e nia rasik hasoru ona milisia no povu balun ne’ebé maka halai ona ba Kupang, Indonesia, tamba ne’e nia hatutan lia povu sira ne’e ba Xefe Estadu  no sei hato’o mós ba Xefe Governu, Kay Rala Xanana Gusmão hodi hanoin tetu para buka dalan ba Timor oan sira ne’e, tamba Timor-Leste no Indonesia iha ona rekonsiliasaun ne’ebé diak.

 “Timor oan ha’u hasoru ema barak ne’ebé sira uluk hanesan milisia, povu barak maka ha’u ba hasoru maibe sira husu hanesan prezensa husi Distritu ida nian atu fo hatene lia fuan ruma para sira bele fila,”dehan Veteranu, Dudu.

Veteranu ne’e hateten Timor oan husi Distritu Ermera ne’ebé maka iha tinan 1999 halai tuir Indonesia ba iha Kupang, Indonesia, hamutuk rihun hitu (7000) hodi sai sidadaun Indonesia. tamba ne’e oras ne’e dadauk Timor oan sira ne’e husu ba Amu Padre husi Distritu Ermera hodi halo misa mós ba sira iha Kupang.

“Ami koalia kona ba rekonsiliasaun ho maluk sira ne’ebé iha mota sorin mai koalia ho Prezidente para ba koalia ho fali ba sira iha mota sorin. Sira hakarak fila tamba ne’e sira husu amu sira iha Ermera ba halo misa ba sira khusus (especial) ba Ermera nian tamba Ermera nian hamutuk ema rihun 7 maka hela iha Atambua tamba ne’e sira husu para amu sira iha Ermera ba halo misa ba sira,” hateten Dudu.

Iha oportunidade, Veteranu Dudu hateten autoridade Estadu TL tomak maka bele hasai lia fuan hodi hanoin oinsa maka imi fila mai Timor-Leste ka lae.dgx

.