Eis-guerilleiru timoroan Mauk Moruk sei prezente iha tribunál iha loron-sesta - advogadu

.

Foto, EPA, António Amaral

Sapo.tl - 14 de Março de 2014

Antigu guerilleiru timoroan Mauk Moruk sei rona iha tribunál distritál Díli nian iha loron-sesta ne’e, tanba suspeita ba krimi sira hanesan tentativa muda Estadu direitu nian ka asosiasaun kriminozu, hatete hosi ninia advogadu ba ajénsia Lusa.

“Sira iha mandadu hodi buka no hodi lori nia ba tribunál, maibé tanba tarde ona maka karik marka ona ba loron aban (loron-sesta)”, Paulo Remédios hatete no refere katak tribunál iha oras 72 hodi bele rona Moruk.

Eis-komandante Brigada Mean sira Falintil nian hetan kaer iha ámbitu operasaun ida ne’ebé hala’o hosi Polísia Nasionál Timor-Leste nian (PNTL) hodi kumpri rezolusaun hosi parlamentu ne’ebé aprova ona iha semana liubá ne’ebé kondena tentativa sira instabilidade no ameasa nian ba Estadu ne’ebé protagoniza hosi Conselho de Revolução Maubere ne’ebé lidera hosi Mauk Moruk no hosi Conselho Popular da Defesa da República de Timor-Leste (CPD-RDTL).

Iha operasaun ne’ebé hala’o iha loron-kinta ne’ebé hahú iha tuku 13:30 loraik, no dura iha oras lima laran, kaer mós Mauk Moruk ninia maun Cornélio Gama (L7) ne’ebé hanesan mós antigu visi-komandante rejiaun 3 nian durante luta ba restaurasaun independénsia nian, no José dos Santos Lemos ne’ebé koñesidu hanesan komandante Labarik Maia ne’ebé hanesan mós eis-kombatente Falintil sira nian, hatete hosi fonte judisiál ba Lusa.

Bainhira Lusa husu kona-bá akuzasaun sira ne’ebé halo hasoru Mauk Moruk, Paulo Remédios hatete katak ne’e hanesan “repetisaun ne’ebé saida maka hakerek iha rezolusaun parlamentu nian”.

Rezolusaun parlamentu nian akuza movimentu ne’ebé Moruk lidera no CPD-RDTL viola artigu haat Kódigu Penál nian no Konstituisaun ida timoroan nian.

Artigu númeru 188 Kódigu Penál nian iha relasaun hp asosiasaun kriminozu ne’ebé iha kastigu oioin entre tinan rua to’o tinan ualu kadeia nian ba “sé maka promove ka harii grupu, organizasaun ka asosiasaun ne’ebé iha finalidade ka atividade hodi halo krimi sira”.
.

“Sé maka sai xefe ka diriji grupu, organizasaun ka asosiasaun sira ne’ebé refere iha númeru uluk sei hetan kastigu ho tinan haat to’o tinan 12”, refere hosi artigu ne’e.

Artigu númeru 194 hatete kona-bá kastigu kadeia tinan ida ka multa ba sé maka “uza no abuza lahó lisensa uniforme, farda no ropa ka símbolu identifikadór sira atividade nian, autoridade ka instituisaun públiku ka internasionál sira nian hanesan dalan fásil hodi hahalok ilegál sira”.

Iha artigu 195, Kódigu Penál timoroan nian fó kastigu kadeia ba tinan tolu ka multa ba “sé maka laiha autorizasaun kaer funsaun ka halao hahalok hanesan funsionáriu, komando militár ka forsa seguransa públiku nian, aplika kualidade ne’e liuhosi liafuan sira”.

Iha artigu 202 refere ba alterasaun Estadu Direitu nian no fó kastigu ba tinan 15 kadeia ba sé maka utiliza “violénsia, ameasa violénsia nian ka dudu ba funu sivil, hakarak estraga, muda ka submete Estadu direitu konstitusionalmente ne’ebé estabelesidu”.

Iha Konstituisaun timoroan, pontu 3 hosi artigu 43 refere katak “proibidu ba asosiasaun armada sira, militár sira ka paramilitar sira no ba organizasaun sira ne’ebé defende ideia ka apela hahalok rasista ka xenófobu sira ka promove terorizmu nian”.

Conselho de Revolução Maubere husu atu sobu parlamentu, demisaun Governu nian, konvokasaun ba eleisaun sira, restaurasaun ba Konstituisaun tinan 1975 nian no alterasaun ba rejimi prezidensiál ida iha nasaun.

CPD-RDTL hanesan grupu eis-veteranu sira nian ne’ebé lidera hosi António Matak, ne’ebé hafoin restaurasaun independénsia, hala’o ona manifestasaun oioin iha Díli hodi husu rekoñesimentu ba independénsia ne’ebé proklamadu iha tinan 1975, nune’e mós hasai organizasaun internasionál sira nian.

Iha loron-kuarta, polísia timoroan hala’o ona operasaun seluk hasoru membru sira movimentu Moruk nian, iha Laga, iha leste Baucau nian, ne’ebé kaer ona ema na’in rua no bomba artezanál ida nakfera ne’ebé halo polísia ida hetan kanek.

Iha sekuénsia hosi operasaun ne’e, Moruk halo ona konferénsia imprensa ida ne’ebé nia akuza polísia ba “brutalidade”.

Nota do blogue: A LUTA CONTINUA, SENHORES COMANDANTES! A LUTA CONTINUA!!!VIVA L7!!!VIVA MAUK MORUK!!!

.