PM Xanana Gusmao: "Governu Sei Uza Forsa Atua KRM No CPD-RDTL"

.

Jornal Nacional Diario - Tersa-feira, 04 Marsu 2014 

Primeiru Ministru (PM) Kay Rala Xanana Gusmao dala ida tan apela ba grupu Konsellu Revolusaun Maubere (KRM) no Conselho Popular Demokratiku Republika Demokratika Timor Leste (CPD-RDTL), ne'ebe sei uza farda militares atu entrega lalais iha tempu badak nia laran, tanba hahalok grupu sira ne'e kontra ona lei ne'ebe vigora iha rai doben Timor-Leste (TL). 

Maibe Xefi Governu Xanana Gusmao esplika katak, se grupu sira ne'e mak la entrega lalais mak Governu sei uza forsa atu halo atuasaun ba grupu KRM no CPD-RDTL. 

Xefi Governu Xanana Gusmao esplika, Grupu KRM sira la fiar, ohin, (orsehik segunda, 03/03/2014, red), iha parlamentu nia oin, hau halarak husu tan dala ida , trempu to'o ona atu aktus ne'ebe viola konstituisaun, nega ezistensia RDTL, atu book an lalais atu evita katak, estadu ida ne'e bele sai estadu entranzisaun hanesan nia defende, maibe sai fali estadu de konflitu. 

"Ohin mos iha PN nia oin, hau aviza ba hotu-hotu ne'ebe hatais farda, imi entrega ou hau rasik nu'udar Ministru defeza, sei tun ba fatin ne'ebe imi marsa hela, ita kaer tiha liman, hau haruka imi sa'e foho, maka ami tuir ba, iha ne'eba la kleru iha liman ona, kilat musan mak sei haree," dehan PM Xanana iha PN (3/3) bainhira Governu ho PN aprova rezolusuan hodi kaptura grupu KRM ho CPD-RDTL. 

Ministru defeza ne'e dehan, nia fo ona apelu dala barak ba soldadu konselu revolusaun nian atu entrega farda, maibe seidauk entega to'o agora. "Ida ne'e hanesan persuade ka hamaus malu," Xanana esplika. 

Maibe xanana haktuir, reprezetante povu sira mak dehan tempu too ona atu hapara movimentu CPD-RDTL ho KRM, tanba liu ona limitis. "Ita rekonese ita nia an katak, ita loke liu, tolerente liu, ema hotu-hotu hakilar hanoin katak, ida ne'e mak demokrasia, tolok ita mos hanoin katak, demokrasia ni direitus hotu, maibe ohin hot-hotu lembra, tempu to'o ona, tanba ultrapasa ona limitis," katak Xanana. 

Xanana fo ezemplu, karik mak governu hetan hatais hela farda atu ba kuda aihan ruma iha toos, governu sei tolera, maibe kuandu sai ona politiku ideolojiku, ho ninia objetivu katak, konstituisaun ida ne'e la vale, no buat hotu-hotu la vale, mak sira rasik hakarak mai revolusaun fulan 6 too tinan ida hodi halo reforma ba estadu ne'e. 

"Ida ne'e halo ita hanoin katak, dala ruma liman seluk husi kotuk karik, tanba ita haree ba mundu, rai sira ne'ebe riku, sempre mosu ema bisu-bisu ba tilun, no ema ne'ebe lolo liman ba bolsu," akresenta Xanana.

 .

 Xanana mos rekonese katak, Governu fala duni, tanba foin lalais ne'e, KRM halo konferensia iha kuartel Jeneral F-FDTL Fatuhada ho farda oi-oin, maibe governu la konsege kaptura sira. 

Tanba ne'e, Xanana husu deskulpa ba povu tomak, no Parlamentu nasional, Xanana mos dehan, iha duni frakeza institusional, tanba instituisaun sira seidauk hatene didiak sira nia kna'ar defeza no soberania. 

"Ba CPD-RDTL, hau la'o hasoru imi iha Timor tomak, hodi husu ba ita boot sira, ita tolera malu, maibe ohin, Nu'udar ministru Defeza no Seguransa, hau sei la tolera ona, tanba imi hotu hatais baret merah, imi hatais farda hau sei ba buka imi, hau hakarak haree tok, imi nia baret merah ne'e hakerek ho saida," akresenta Xanana. 

Xefi Governu ne'e mos husu ba CPD-RDTL atu koalia buat ruma karik, tenki iha prinsipiu baziku ruma, tanba bandeira ne'ebe sira halo, viola tiha ona konstituisaun ne'ebe CPD-RDTL defende. I tuir Xanana, CPD-RDTL defende konstituisaun 75, maibe lalee konteodu konstituisaun ne'e.

.