Jose Belo Prontu Viola Lei Komunikasaun Sosial

.

Jornal Nacional Diario - Thursday, May 15, 2014

 “Iha ne’e mak harii tiha Lei uluk, depois mai koalia konaba hamutuk haforsa media iha Timor Leste ? Horibainruak hau dehan ba Sr. Prezidenti da Republika , Sr. Prezidenti sei sai tan prezidenti tinan tolu, prezidenti sei lasai husi jornalista, Sr. prezidenti sei ba vizita liur oin sei la foti sae se jornalista ida tama kadea. E ohin hau hakarak hateten iha ne’e katak, hau sei halo violasaun sistematika ba artigu sira ne’ebe mak iha Lei Komunikasaun Sosial to’o hau tama kadea,”deklara Prezidenti Timor Leste Press Union (TLPU), Jose Belo wainhira sai orador ba Seminario nebe SEKOMS Organiza konaba haforte kapasidade media, Kuarta horseik.

Iha seminariu nee TLPU, Jose Antonio Belo nudar orador ba seminario refere wainhira koalia taka ibun uja masker ho hakerek “Timor Leste Free Press” ne’e lamenta seminario ne’ebe mak Governu kria ho komunidade media sira, tanba hafoin Lei Komunikasaun Sosial aprova maka kria fali seminario.

Iha oportunidade ne’e nia parte kestiona birokrasia iha instituisaun Governu ninian ne’ebe mak dala barak la fasilita ho diak media sira hodi hetan informasaun. Nune’e mos nia parte preokupa fundu transferensia ne’ebe mak SEKOMS fo ba instituisaun media sira foin lalais ne’e no seluk tan.

Entretantu iha seminariu ne’e prezidenti TLPU, Jose Antonio Belo nudar orador iha seminariu hodi koalia konaba “dezafiu media konvesional no media online iha Timor Leste nia hateten media online, jornal, revistas, radio, televisaun inklui twiter, website, sira e’e parte media konvesional nian. tantu nia dehan instituisaun media forte tenki forte iha notisias no instituisaun media iha fundus rasik.

Sekretaria Estado Komunikasaun Sosial (SEKOMS) kria seminario nasional ho komunidade media sira ne’ebe mak ejiste iha Timor Leste (TL) oinsa hasae kapasidade instituisaun media hodi promove no garante liberdade imprensa, liberdade eskpresaun no direitu ba informsaun publiku ninian.

Seminariu nasional durante loron ida ho Tema “Hamutuk Haforte Kapasidade Media iha Timor Leste” halao iha Otel JL.Vila Fatuhada, Dili Kuarta (14/05) horseik ne’e lidera husi Sekertariu Estado Komunikasaun Sosial (SEKOMS) ne’e partisipa husi media emprime (jornais-Red), Radio, Televizaun, Online inklui media officer husi instituisaun Governu ninian.

Iha intervensaun SEKOMS, Nelio Isaac Sarmento afirma, objektivu husi seminariu ne’e atu halibur ideias entre Governo ho entidade media konaba estratejia oinsa hakbiit kapasidade media iha TL, tanba papel media importante tebes.

“Papel media mos importante tebes iha esforsu sira ba promove no garantia liberdade imprensa, liberdade ekspresaun no garantia povu nia direitu ba informasaun. Tanba ne’e media sira tenki forte iha aspeitu hotu hodi bele halao papel sira ne’e,”hatete sekretariu estadu Nelio Isaac Sarameto.

Nelio Isaac hatutan tan katak, media nudar ponte ba informasaun, tanba ne’e Governu kria seminario refere para hamutuk ho komunidade media sira hodi tau hanoin hamutuk nune’e haforte bei-beik kapasidade media ninian.

“Governo hakarak tuur hamutuk ho media sira hodi elabora ideia estatejiku sira ba haforte media nia kapasidade husi aspeitu hotu-hotu, tanba ne’e liu husi seminariu durante loron ida ne’e haesan parte integrante ida husi husi esforsu sira atu haforte bei-beik media nia kapasidade hodi ezerse papel kanalizasaun no fasilitador informasaun ba mai entre ukun nain ho povu no haforte mos papel media hanesan kontrolu sosial,”koalia Nelio Isac.

Orador iha seminariu refere kompostu husi Sekretariu Estadu Komunikasaun Sosial (SEKOMS), Nelio Isaac Sarameto, koalia konaba politika no programa Estadu hodi hakbiit media, Presidente Assosiasau Joralista Timor Leste (AJTL) TitoFilipe, koalia konaba parseria servisu hakbiit media entre entidade Media, Assosiasaun jornalista, sosiedade civil no governo.

Presidente Timor Leste Press Uniaun, Jose Antonio Belo koalia konaba media konvesional no media online, dezafiu no oportunidade, Diretur Jornal Mata Dalan Cancio Ximenes koalia konaba Estratejia media uja fundus trsferensia publikus, SEKOMS nian ba haforte kapasidade Media. Tantu diretur Timor Post Loureco Martins koalia konaba topiku ida kona estratejia haforte kapasidade negosiu media nian iha TL.

Partisipa iha seminariu ne’e mai husi Assosiasaun Jornalista Timor Leste (AJTL), Timor Leste Press Uniaun (TLPU), Fundasaun Fundu Media (FMM), TILPA, CJITL,TLMDC, Joralista husi media emprime no elektronika, estudante universitariu Departametu Komunikasau sosial UNTL inklui media Officer instituisaun Governu ninian. MJ-1

.