"Osan Barak Lakon Iha Uma Veteranu"

.

Jornal Independente - Segunda-Feira, 19 Maiu 2014 

Parlamentu Nasional (PN) konsidera planu Governu halo uma ba veteranus ne'e gasta osan saugate, tanba to'o oras ne'e uma hirak ne'e sei abandonadu no kuaze aat hotu. Iha mandatu Kuatru (IV) Governu Konstitusional, Governu Aliansa Parlamentar (AMP) harii uma ba veteranu sira iha kada Distritu, maibe laiha kondisaun ne'ebe diak ba veteranu sira. 

Tanba ne'e, Prezidenti Komisaun F Parlamentu Nasional (PN), Virgilio Hornai hateten, uma ba veteranu ne'ebe Governu AMP halo ne'e la tuir kondisaun sosiu kultura TL nian. 

"Ita Timor ne'e familia boot ne'ebe familia ida kuaze nain hitu (7), maibe mai hela fali uma ho kuartu rua deit no espasu klot," dehan nia, iha Parlamentu Nasional, sesta (18/5). 

Nia hatutan, Governu fakar osan barak ba projetu ne'e, maibe ikus abandona deit to'o dodok, tanba ne'e, presiza implementa planu ruma, labele hanesan porjeitu maibe tenke hatene atu oinsa nesesidade ba komunidade sira. 

 Tanba ne'e, prezidenti komisaun F husu atu loke investigasaun ba programa harii uma ba veteranus sira, tanba gasta osan saugate deit. Husi fiskalziasaun ne'ebe komisaun F halo, identifika katak uma veteranu iha Distritu manatutu ne'e Governu entrega fali ba Polisia Nasional Timor-Leste (PNTL), maibe iha fatin seluk hanesan, iha Distritu Lautem no Metinaru inklui Distritu seluk abandona deit to'o dodok. 

 Entertantu, membru Bankada FRETILIN, Antonio da Costa "55" afirma, nia parte senti governu iha hanoin diak ba veteranus sira, maibe laiha planu estudu no kordenasaun diak ba veteranu sira. 

Nia fo ezemplu, iha Distritu ermera, Governu halo uma ba veteranu maibe veternu lakohi ba hela to'o uma hirak ne'e sai aat. "Ita haree governu halo uma mais laiha kondisaun, tanba ema veteranu sira kuaze tinan naruk soe familia no foin mak atu hamutuk ho nia familia, maibe kuartu rua deit ne'e oinsa mak veteranu sira atu mai hela hamutuk ho familia," dehan nia. 

Nuudar Veteranu ida husi Distritu ermera nian, nia sujere ba Governu atu implementa planu harii uma lima ba veteranu tenke kordena ho veteranus sira, atu harii uma ne'e besik nia familia, tanba uma hirak ne'e harii dook husi nia familia sira.

,