"ZEESM Sai Xave Dezenvolvimentu Ekonomia Timor-Leste"

.

Jornal Independente - Kinta-Feira, 22 Maiu 2014 

Prezidenti Republika (PR) Taur Matan Ruak hateten, implementasaun Zona Espesial Ekonomia Merkadu Sosial (ZEESM) sai xave primeiru ba dezenvolvimentu ekonomia nasaun Timor-Leste nian atu kompete iha rejiaun no mos iha mundu. 

 Iha loron 25 Maiu 2014, eis Primeiru Ministru Mari Alakatiri, Primeiru Ministru Kay Rala Xanana Gusmao no Prezidenti Republika Taur Matan Ruak sei halo lansamentu primeira pedra ba implementasaun projetu ZEESM, iha Distritu oekusi. Tuir PR Taur, lansamentu ne'e hanesan prosesu ida atu hahu transforma enclave Distritu Oekusi sai furak liu tan, nune'e bele sai mos hanesan Distritu Dili. 

Nia hatutan, dezenvolvimentu Oecuse, dezenvolve Timor-Leste, ne'e hahu ona atu dezenvolve no kompete Timor-Leste iha mapa ekonomia mundial ninian. "Imi Atoni-oan, ne'e sei muda, maibe ida ne'e atu muda se imi Oekusi oan sira la baruk atu servisu makaas, servisu la para, hadeer sedu, maka Oekusi sei lao ba oin," hateten PR Taur, bainhira hala'o dialogu ho komunidade iha Suku Sune-Ufe, Sub-Distritu Nitibe, Distritu Oekuse horseik. 

Xefe Estadu rasik apoiu totalmente filozofia implementasaun ZEESM iha Enklave Oekuse, tanba ne'e hanesan meus ida atu motiva povu sira sai na'in ba dezenvolvimentu nasional. 

 PR Taur akresenta tan katak, implementasaun ZEESM iha pais barak hatudu ona esperensia moruk, tanba la dun fo benefisiu ba ninia povu rasik, tanba ne'e, iha oportunidade ne'e PR Matan Ruak, bolu atensaun ba Oekusi-oan sira atu kontribui maka'as hodi bele minimiza dezafiu oioin neebe nasaun doben ne'e hasoru.

Iha parte seluk, nia dehan, lansamentu Zona Ekonomia Espesial Sosial Merkadu (ZEESM) iha Distritu Oekusi mos hanesan faze importante ba iha preparasaun Timor-Leste nian hodi hadere ba iha membru sudeste Aziatiku ka ASEAN ninian.

.