“MF Emilia Iha Rai Liur Afeita Ba Salariu Funsionariu Kiik”

.

Jornal Independente -Kuarta-Feira, 07 Maiu 2014

Parlamentu Nasional (PN) lamenta Ministra Finansa Emilia Pires ne’ebe abandona ona servisu hodi difikulta sistema pagamentu ba seguransa sivil no motorista sira nia salario.

Vise Prezidenti Parlamentu Nasional, Aderito Hugo da Costa hateten, Parlamentu Nasional observa servisu Ministra Finansas Emilia Pires ne’ebe durante ne’e fo kestaun boot reseitas no despezas nasuan ne’e nian.

“Hau simu delegasaun ida husi funsionariu kontratadu sira liliu iha seguransa sivil ne’ebe lamenta tebes tanba fulan lima ona maibe la simu salariu tanba deit mudansa despezas iha Ministeriu Finansas nian liliu jestaun depagamentus,” dehan nia iha PN horsehik.

“Ne’ebe muda husi sistema seluk ba sistema foun haluha tiha funsionariu kiik sira ho salariu kiik ne’ebe hau imazina katak, hanesan Ministra financas mak la simu salariu nia sei la sente, maibe koitadu ba seguransa sivil sei senti tamba salariu kiik tebes,” dehan nia.

Tanba ne’e, Vise prezidenti koko atu konfirma ba Ministeriu Finansas maibe informasaun mai dehan katak, mudansa iha pagamentu ba funsionari kontratadu sira.

“Hau koko atu konfirma ba Ministra Financas Emilia Pires maibe hanesan bai-bain Ministra Emilia nunka iha tempu ba asuntu rai laran ne’ebe susar atu halo konfirmasaun no esplikasaun,” dehan nia.

“Hau bele kumprende Ministra Finansas hanesan sentra ba politika despezas estadu kada tinan laiha konsentrasaun iha rai laran,” nia triste.

Ba kestaun ne’e, membru Bancada Opozisaun FRETILIN iha PN, Maria Anjelica Ranjel dehan, nia parte konsidera Emilia Pires laos ona Ministra Finansa TL nian maibe sai fali Ministra ba g7+ nian hodi promove nia an iha mundu internasional nia matan.

“Hau konsidera Emilia Pires laos ona Ministra Finansas no hau sente merese bolu ona Ministra G7+ tanba ba promove nia an iha nasaun estranjeiru hodi la halo atividade finansas Timor-Leste," lamenta nia.

Entertantu, membru deputadu Bancada CNRT, Cesar valente de Jesus Piloto mos lamenta tebes bainhira motorista PN seidauk simu salariu ne’e preokupasuan no failansu iha Ministeriu Finansas ne’ebe nia jestor rasik laiha fatin maibe ba fali estranjeiru.

“Ita nia motorista la simu salariu ne’ebe organiza an husi Finansas Parlamentu Nasional nian ba Finansas Estadu nian maibe dehan iha mudansa sistema pagamentu ne’e la diak,” lamenta nia.

Nune’e mos, Deputadu Bancada Partidu Demokratiku (PD), Virgilio Hornai, husu ba Ministra Finansas atu lalika sai hanesan Ministru negosiu estranjeiru maibe tenke konsentra iha servisu finansa nian atu nune’e transferensia ba salariu no pagamentu labele faille.

“Ami husu Emilia Pires atu la bele sai fali Ministru negosiu estranjeiru hodi pasiar iha rai liur hodi lakohi halo servisu finansas Timor-Leste,” tenik nia.

Tuir observasaun Diario ne’e katak, tersa horsehik Ministra Finansas Emilia Pires foin fila hikas mai Timor-Leste liu husi Aeroportu Internasional, Nikolau Lobato, Dili.

,