Kazu BOP Baku Bosco Lobato; "Autoridade Lokal Husu PNTL Labele Hakiak Bandidu"

.

Jornal Independente - Segunda-Feira, 19 Maiu 2014 

Xefe Suku Komoro, Eurico de Jesus husu ba Komandu Jeral Polisia Nasional Timor-Leste (PNTL), atu foti medida forte ba membru Batallaun Operasaun Polisia (BOP), Ajente Xefe Jose Mesquita ne'ebe viola prinsipiu no knaar PNTL hodi halo agresaun fiziku hasoru vitima Boisco da Conceicao, foin lalais ne'e iha Tasi tolu. 

"Husu ba Komandu PNTL atu aplika sansaun forte no husu labele hakiak bandidu iha instituisaun laran," dehan Eurico, iha Tasi Tolu, Kinta (15/5). Nu'udar autoridade iha Suku Komoro, Eurico konsidera hahalok membru BOP, Ajente Xefe Jose Mesquita, hodi baku Bosco to'o kanek la koresponde ba prinsipiu no palavra PNTL nian atu mantein lei no orden. 

 "Atu hateten ba publiku katak, hahalok ne'ebe halo husi membru BOP hasoru Bosco, ne'e ita hare hahalok ne'ebe ladun furak, tanba ne'e hau nuudar autoridade lokal husu ba komandu PNTL atu foti medida forte ba Ajente Jose Mesquita," tenik nia. 

Xefe suku ne'e mos lori komunidade no familia vitima nia naran husu ba Primeiru Ministru nuudar mos Ministru Defeza no seguransa (MDS) atu tau atensaun ba violasaun direitus humanus ne'ebe komete husi membru BOP ne'e. Alende ne'e, familia vitima mos husu ba Komandu PNTL atu bele hola medida forte para hasai nia membru ne'ebe hatudu aan hanesan bandidu hodi ignora PNTL nuudar mantein lei no orden. 

"Se komandu PNTL husi atetude sira hanesan ne'e iha instituisaun PNTL nia laran, mak neineik no beibeik sei estraga instituisaun PNTL nia kredibilidade iha porvu nia matan," dehan familia vitima. 

Nune'e familia vitima mos husu ba komandu PNTL atu labele hanorin deit nia membru sira fizikamente, maibe eduka sira ho moralmente no edukasuan sivika, atu sir abele hatene didiak sira nia knaar atu mantein lei no orden, no respeita direitu umanu, bainhira sira ba atua problema iha terenu.

,