"Problema Osan Ba Brazil, Bolseiru Hein Governu Hadi'a Frakeza"

.

Jornal Independente - Kuarta-Feira, 14 Maiu 2014 

Fallansu husi Ministeriu Finansas iha transferensia osan ba bolsu estudu kontinua difikulta moris estudante Timoroan sira nian iha Brazil, tanba to'o ohin loron estudante sira ne'e seidauk bele simu oan ne'e. 

Banku iha Brazil labele transfere osan ne'ebe mak manda husi Ministeriu Finansas iha Dili ba bankaria, estudante Timoroan sira tamba Ministeriu kompotente hakerek katak, osan ne'e nu'udar salariu ba estudante. Estudante Nivel mestradu, Universidade Federal Santa Catrina, Brazil, Venancio Sarmento dehan nia seidauk hetan osan ne'e tanba orden finalidade la tau osan bolsu estudu, maibe tau fali salariu. 

"Mezmu osan tama ona iha banku Brazil fulan ida ona, mas Banku labele 'cairkan' ba ami nia konta bankaria tanba Governu manda osan falla iha finalidade da orden sira tau fali salariu e la tau bolsu de estudu ka doasaun," dehan Venancio lu husi Facebook. Estudante Nivel mestradu hamutuk nain 10 mak hasoru problema ne'e, dehan nia, hodi hatutan estudante sira iha Nivel lisensiatura ne'e laiha problema tanba hakerek bolsu estudu. 

Osan ba Bolseiru Nivel estudu Doutoradu (S3) US$950 kada fulan, Nivel graduasaun (S1) US$750 kada fulan, ne'ebe kada fulan neen (6) mak Governu manda ba sira, dehan venancio. Nia husu ba Ministeriu Edukasaun hodi rezolve Problema ne'e lalais. Ministru edukasaun Bendito dos santos Freitas dehan nia sei kontakta Ministeriu Finansas hodi hadia fallansu ne'ebe mak mosu iha transferensia osan ne'e. 

"Hau sei... kontaktu uerjente ho Ministeriu Finansas atu haree lalais ba kestaun ne'e tanba estudante bolseiru sira ne'e importante tebes, nune'e bele responde sira nia nesesidade ," dehan Ministru Bendito, iha salaun rekorente Vila-Verde, Dili, segunda (12/05). Diretor Jeral Servisu kooperativu Ministeriu Edukasaun, Antoninho Pires hateten, nia parte sei kopera ho adidu Edukasaun ho Ministeriu Finansas hodi rezolve problema ne'e iha tempu besik, maibe data hadia fallansu seidauk fiksu. 

 "Oras ne'e dadaun ami sei esforsu nafatin no iha ona faze balun, tan ne'e iha tempu besik osan sira ne'e bele tama ona iha konta Bankaria estudante sira nian," dehan nia. 

.