Planu Retiru Iha Maubara, "Alkatiri Hatene, La Sama Dehan Boatus"

.

Jornal Independente - Tersa-Feira, 08 Jullu 2014 

Planu Primeiru Ministru (PM) Xanana Gusmao atu halo retiru ho nia membru Governu sira iha Maubara hamosu polemika boot iha Publiku. 

Sekretariu Jeral Partidu FRETILIN, Mari Alkatiri dehan konsege deskobre ka hatene informasaun retiru ne'e loos duni, tanba Xefe Governu mak konfesa ba nia (Alkatiri) rasik, entertantu, Primeiru Ministru interinu Fernando La Sama de Araujo konsidera infomrasaun ne'e boatu deit. La Sama dehan, laiha ema ida mak deskobre kona ba PM Xanana nia rezignasaun no planu retiru iha Maubara. 

Tanba tuir La Sama dehan, planu atu rezigna aan ka lae, ne'e depende ba iha konxiensia Primeiru Ministru Xanana Gusmao nian. 

"Hau hanoin se mak atu hanoin katak, rezigna aan ka lae ne'e PM Xanana rasik mak hatene, nia mak tetu rasik buat hotu, no laiha ema ida mak atu hatete dehan Primeiru Ministru tenke rezigna an ou lae," hateten La Sama iha sentru Kultura Xanana-Lesidere, Sesta (04/07).

 La Sama dehan, kona ba planu atu rezigna aan ne'e, so PM xanana mak tetu rasik no nia mak bele hola desizaun rasik, nia dehan to'o agora membru governu sira seidauk koalia kona ba asuntu ne'e. Iha semana kotuk, eis PM Mari Alkatiri informa ona katak, nu'udar lider politiku no amigu diak, PM Xanana konfesa ona ba nia katak, Xanana sei realiza duni ninia deklarasaun kona-ba nia rezignasaun. "PM Xanana hateten ona ba hau katak nia hakarak rezigna aan duni, no hau respeita nia pozisaun, no hau nia preokupasuan mak, se loos mak atu troka nia," dehan Alkatiri iha salaun Delta Nova foin lalais ne'e. 

Eis Primeiru Ministru Alkatiri mos realsa katak, nia rasik koalia ho Xanana kona ba desizaun atu Xanana rezigna aan husi kargu Primeiru Ministru, no Xanana mos deklara ona katak, to'o ona tempu ba nia atu deskansa no sai husi kargu politiku, maibe la signifika katak sai husi vida politika, rezigna aan mos husi Timor-Leste. 

 Xanana mos sei kontinua suporta no fo nia kontribuisaun atu dezenvolve nasaun TL husi kotuk. Planu rezignasaun ne'e halon iha tinan kotuk (2013), PM xanana rasik mak deklara ba publiku iha rai liur no rai laran, Xefe Governu mos deklara katak, antes rezigna aan, nia rasik sei halo remodelasaun ba estrutura. 

,