LEI KOMUNIKASAUN SOSIAL IHA KONTEKSTU HAMETIN SOBERANU ESTADU DE DEREITO DEMOKRATIKU ENTRE POLISIA NO MEDIA

.

Renato da Costa

Husi: Renato da Costa

Nudar buat nebe ita hotu  hatene  katak kada instituisaun atu nia instituisoens  governo ou naun governo iha misaun e vizaun no metas ho objetivos nebe tenki alkansa, no laiha instituisaun bele atingi ninia objektivos se  instituisaun ne’e deskonhesidu ou izolado, exzeto ba organizasaun illegal. 

Hodi bele estabelese relasaun nebe harmonia ho vários grupos iha instituisaun laran no mos boa relasaun ba liur, sertamente no nesessidade duni ita presiza harii boa relasaun ho instituisaun hotu inklui mos media, hodi mantein  relasaun harmonioza ho polítika nebe mak iha ba interesse  instituisaun nian.

Na verdade katak iha  situasoens paises nebe ninia sidadaun inteligente, krítiku no kompetitivu atu explora oportunidades nebe eziste, media sai pontus prinsipais nebe utiliza husi  organizasaun, hodi  alkansa  no promove objetivu nebe planeadu. Normalmente informasaun hirak ne’e uza nudar maneiras  hodi fanun kunsiensia publiku kona ba servisu nebe mak halao hela husi institusaun refere hodi bele hamosu opiniaun publika nebe positivu. Opiniaun publiku bele sai negativu wainhira fornesementu informasaun nebe konsumu husi publiku insufisiente no limitadu. 

Tamba ne’e, meios de komunikasaun ou  media iha papel nebe importante iha vida kriasaun estadu de dereitu demokrátiku, liu liu iha pais nebe foin hakat sai husi pais post konflitu ba pais dezenvolvidu.  Hodi rekunhese katak, ezistênsia imprensa nebe livre no independente   konsidera  nudar quartu pilar ba ai ring  vida demokrátika depois exekutivu, legislativu no judisial. 

Iha processu nebe própriu ba demokratizasaun nian,  meius  komunikasaun sira demonstra papel signifikativu tebes. Media nebe menciona iha  artigu ne’e mak meius de komunikasaun ho ninia espektru nebe bo’ot. Hahu’u husi  Media  konvencional ( jornais e revistas), Media eletrônika (rádiu e televisaun), nune’e mos ho media online (sites de notísias, weblogs, redes sosiais, no sira seluk).

Iha parte seluk, Polisia  nudar instrumentu  Estadu nebe desempenha  papel hodi asegura manutensaun no seguransa e ordem públika, aplikasaun husi lei ne’e Polisia fornece protesaun, ba komunidade iha âmbitu  manutensaun no seguransa  país nian . Tuir termus  legislasaun ne’e hateten katak, Polisia ninia funsoens maka 1) Harii manutensaun  seguransa hodi asegura ordem públika.2) Defende lei.3) Fornese protesaun ba atividade no movimentu komunidade hodi garanti  manutensaun no ordem, seguransa ho tranquilidade públika.

Tamba, imprensa ou media nudar instituisaun sosial iha país demokrátiku konsidera tebes nudar instituisoens  representasaun  sosiedade. Tamba ne’e atu diak ka ladiak, wainhira polisia halao nia servisu tengki hasoru mos media. Rezultadu husi situasaun ne’e, dalaruma media hakerek ladun iha honestidade kona ba servisu nebe mak  polísia halao. Dalaruma media sempre halo nia nutisias  kaluniandu no desakredita polísia. Naturalmente,  fenômeno hanesan ne’e polisia lakohi atu akontese , tamba bele rezulta imagem at  instituisaun nian iha públiku tamba opiniaun nebe mak hamosu husi media.

Klaru, katak Polísia tengki  promove kooperasaun ho imprensa iha fatin nebe deit. Naturalmente, relasaun refere konsidera nudar relasaun profissional. Se koalia kona ba servisu jornalismu nian, media bele sai parseria diak Polisia nian hodi  ajuda  harii paz no hakmatek tuir tarefas nebe mak fo sai iha lei komunikasaun sosial artigu 3 kona ba FUNSOENS DA KOMUNIKASAUN SOSIAL. Konsidera mos katak, journalista nudar mos sidadaun bain bain hanesan sidadaun sira seluk iha mos konsiênsia, motivasoens no nesesidades hodi promove iklima paz no hakmatek iha ninia reportagen ho verdadeiru no laos boatus ou rumoris. 

Profesionais media  iha fiar katak  jornalistas profissionais  sei lahakerek nutisia nebe hamosu paniku ba ninia sidadaun. Journalista hirak ne’e iha obrigasoens respeita kona ba étika jornalístika no disposisoens legais nebe fo sai iha lei komunikasaun sosial. Frankamente ita tengki dehan katak entre Polisia ho media iha dever nebe hanesan katak hotu hotu halao servisu ba  interesse  nasaun nian laos ba grupu balun nia hakarak. 

Portantu, perguntas mak ne’e, oinsa atu iha kumprensaun ba malun entre servisu Media ho Polisia kona ba implementasaun Lei komunikasaun ne’e rasik iha vida journalismu no mos atuasaun polisia nian hodi asegura ordem publiku? . Em termus gerais, existe  questão 4 husi  assuntu Lei Komunikasaun sosial ne’e nebe mak precisa iha kumprensaun entre institusaun 2 ne’e (Media no Polisia) mak hanesan, 1) Liberdade  imprensa. 2) Kódigu de étika. 3) Lei de imprensa.. 4)Kriminalizasaun  imprensa.

I. LIBERDADE DE IMPRENSA

Iha pais nebe aplika sistema  demokrasia,  liberdade de imprensa konsideradu nudar necessidade. No  liberdade de imprensa sai fatores determinante no  importante tebes ba ai ring  demokrasia nian. Ita bele dehan katak se demokrasia laiha liberdade, demokrasia ne’e ita bele hanaran "ditadura". Fontes husi direitu  liberdade   ko’alia no informasaun ninian, fo sai klaru iha ita nia Konstituisaun PARTE II DIREITU, DEVÉR, LIBERDADE NO GARANTIA FUNDAMENTÁL SIRA, TÍTULU I PRINSÍPIU JERÁL SIRA Artigu 16 kona ba (Universalidade no igualdade)  hateten katak; 1)Sidadaun hotu-hotu hanesan iha lei nia oin, no mós iha direitu no obrigasaun hanesan.. 2) Labele halo diskriminasaun ba ema ida tanba nia kulit, nia rasa, nia estadu sivíl, nia seksu, orijen étniku, nia lian, pozisaun sosiál eh ekonómiku, hanoin polítiku ka ideolojia, relijiaun, instrusaun eh nia kondisaun fízika eh mental. 3) No Artigu 40 Liberdade ko’alia no informasaun ninian  katak  Ema hotu-hotu iha direitu ba liberdade ko’alia nian no direitu atu hetan informasaun ruma, no tan informasaun loloos nian.

Ho artigo ne’e ,  klaru katak liberdade  imprensa ninia natureza laos absoluta. Iha pais nebe deit liberdade imprensa tengki permanence tuir  lei nebe mak ezisti no hetan aseitasaun tiha ona husi povu tomak. Liberdade imprensa nebe previsto iha Konstituisaun katak: i) Respeito ema seluk nia direitos. ii) Respeita  normas religiosas. iii) Respeita normas morais. iv) Asegura no respeita mos seguransa  Estado. v) Kumpri ordem públika. 

Iha Lei Komunikasaun Sosial nº 5 de 2014, liberdade  imprensa  afirmado kedas iha artigo 9 kona ba LIBERDADE EKSPRESAUN  no  artigo 20 kona ba DEVERES GERAIS JOURNALISTA NIAN, katak" jornalistas iha obrigasoens atu  proklama akontecimentos no opiniões hodi respeita nafatin ba normas religiosas no respeita nafatin ba normas nebe mak konsidera nudar moralidade  sociedade nian, no mos presunsaun de inocênsia.". Atu dehan katak media proibida atu halo violasaun ba princípio  presunsaun de inocênsia.

Tamba ne’e liberdade imprensa laos sinal katak kobertura media refere bele publika saida deit mak sira hakarak hodi haluhan ema seluk nia direitu. Nudar Lei inan hateten katak respeita mos ema seluk nia direitu bele sai mos matadalan ba media sira hodi halo mos tratamentu nebe dignu ba ninia sidadaun ho justu no imparsial. Wainhira ita uza ita nia direitu ho proprio nudar journalista, ita mos sei hetan rekunhesementu nebe as husi partes hotu inklui instituisaun seguransa sira.

II. KÓDIGO ETIKA

Servisu journalista rekonhecidu nudar profissão, hanesan mos  polisiais, médikos, kontabilistas, notários no seluk seluk tan. Atu hadomi Profissão ho profesionalismu presiza tebes iha edukasaun espesial.

Nune’e mos atu sai journalista, presiza tebes hatene regras no normas nebe mak estabelesidu tiha ona iha  kódigo de étika Jornalismo nian. Iha espetativa bo’ot husi  maluk journalista nebe atu sai journalista tuir Lei Komunikasaun Sosial, Kapitulo III kona ba JOURNALISTAS (artigu 12 – 16),  katak depois liuhusi prosesu ne’e hotu ita iha duni journalista nebe halao nia servisu tamba profisaun laos tamba opurtunidade deit - journalista BODREX (sai journalista derepenti deit depois lakon tiha). 

Hanesan fo sai iha Kapitulo II – kona ba PRINCIPIOS FUNDAMENTAIS husi lei komunikasaun sosial nian katak , 1) Notísias precisa, equilibrado no la iha intensaun at. Signifika katak notísias tengki faktual; dados korretos ,unikamente laos ataka pessoa tamba kausa husi sentimento negativo ou fatores tamba la gosta. 2) Jornalistas toma forma profissional ba realizasaun halao  dever nudar jornalístikos. Signifika katak la ameasa ema nebe fo informasaun  ou qualquer pessoal balun ho nia tentativas hodi hetan  notísias; tengki notifika identidade jornalísta kuandu halao atividade jornalístika; tengki  respeita ema nebe disposto atu fo nia opinião. 3)Labele kahur malun entre Fatos no opiniões wainhira halo notísias; notísia tengki equilibrada, la viola presunsaun de inocênsia. Signifika katak tengki halo separasaun nebe klaru entre fatos ho opiniões jornalistas nian; informasaun tengki kobre fatin rua laos  sita deit parte ida nian( cover both side); labele halo julgamentu. La publika  notísias falsa, difamasaun ho linguasem sira nebe provokativu kona ba pesoal nebe sai alvu publikasaun. 4) Jornalistas tengki aktualiza nia an hodi simu direito de resposta , direitos rektifikasaun husi publiku ho proporcionalmente (Kapitulo I kona ba DISPOSISOENS GERAIS). Signifika katak Se iha ninia leitores balun ou instituisoens ruma diskontenti ba konteúdo husi notísia, espesialmente notísia refere konsiderado prejudisial tebes,media iha dever atu fo sai  aviso ou klarifikasaun husi  pesoal ho instituisaun nebe mak haruka karta kona ba direito de resposta no direitos rektifikasaun. Importante atu toma konsiderasaun  katak se  notísia refere publika iha primeira página, qualquer objeksaun nebe mak mai tengki  publika mos iha primeira página.

Atu hametin soberanu estadu de dereito demokratiku, liu liu iha sirkulasaun informasaun ba publiku, kodigo etika  nebe mak iha, tengki sai ukun fuan servisu journalismu nian iha prosesu rekolha no publika informasaun sai ba publiku.

III. LEI DE IMPRENSA.

Lei nº 5 de 2014 sobre a Imprensa (Lei de Imprensa) nebe komposto husi 54 artigos, fahe ba  oito kapítulos, konsidera nudar  lei de imprensa nebe simples. Tamba Lei  Imprensa ne’e koalia asuntus barak liu mak kona ba direitos da imprensa kompara ho  obrigasaun  imprensa nian.

Iha kapítulo V, kona ba DIREITO DE RESPOSTA E RATIFIKASAUN, laiha sansoens ameasados prisão ba journalista sira  nebe aplika mos ba  cidadãos  bain bain nebe impede implementasaun  liberdade de ekspresaun, hanesan fo sai iha  Kapitulu  VI kona ba FORMAS DE RESPONSABILIDADE , artigo 41 (Atentado a Liberdade de Informasaun) hateten katak  Ema ne’ebe mak impede hala’o aktividade jornalistika sei hetan pena prizaun to’o tinan rua ka selu multa (pontu 1), no mos funsionáriu públiku ka ajente Estadu nian, ne’ebé komete atentadu hasoru liberdade imprensa sei hetan pena prizaun to’o tinan tolu ka selu multa (pontu 4).

Iha kestaun ne’e, ita presija iha klarifikasaun nebe mais kumprensivus hodi nune’e bele asegura duni ordem publiku liu liu ba aktus servisu journalismu nian nebe ninia informasaun hamosu perturbasaun  movimentu pesoal ema nian. Klaru tebes katak,  injustisa uitoan no iha tratamento diskriminatório ba ninia sidadaun refere ba artigo ne’e. Jornalistas rejeita tama prisao tamba bele resolve deit iha Konselu Imprensa ho sansaun ou multa balun nebe la aplika ba sidadaun bain bain. Iha  asuntus ida ne’e ita tama ona ba iha questão  "kriminalizasaun husi imprensa". 

IV. Kriminalizasaun IMPRENSA 

Nudar jornalistas, balun iha fiar katak servisu journalismu nudar profisaun nebe tengki iha asesu ba kualker eventus. Tamba jornalista konsidera nudar "DEFESA DEMOKRASIA nian". Vida  demokrasia atu lao diak tengki iha partisipasaun masimu husi  imprensa. Ho vida imprensa nebe livre,  sistema demokrátiko mos mais forte liu tan. Tamba ne’e, maske  jornalista konsidera kulpado wainhira halao nia funsoens nudar journalista husi tipu erros ba reportagem   nebe mak iha, journalista ou nain ba media sira  hetan deit  pena multa hanesan fo sai artigo 8 husi Kapitulo V kona ba DIREITO DE RESPOSTA E RATIFIKASAUN. Maibe,hanesan ita nia lider resistensia balun dehan katak “Journalista laos sidadaun privelegio” no konsidera ema hotu hanesan iha lei nia okos, ita moz ezizi ba journalista sira atu halao nia profisaun ho profesionalismu hodi asegura mos instabilidade iha rai laran. Hodi halakon informasaun bazeia ba rumoris,boautus no defamasaun nebe prejudika ema nia movimentu iha publiku.

Konceito Kriminalizasaun IMPRENSA, nudar sinais ba ita hotu atu toma atensaun oinsa journalista sira  tengki evita husi sansoens penais no mos uza liberdade de imprensa ne’e hodi  asegura nafatin responsabilidade profisaun journalismu nian. Se  jornalistas tauk ameasa ba  krime husi informasaun nebe journalista halo,ejiji tebes atu journalista servisu ho padraun nebe mak estabelisidu tiha ona.

Tamba, liberdade de imprensa labele sai fali abuzu de poder ba  interesses media nian. Se journalista hato ninia nutisia nakonu ho fraude ba publiku no ikus mai hamosu stigma destrutivo ba pessoal balun no intencionalmente difama no hamosu ameasas ba  seguransa  Estado nian, klaru Polisia iha obrigasoens atu atua tuir lei nebe vigora iha RDTL.  Atu dehan deit katak, liberdade de imprensa sei lahetan por kausa sansoens penais hodi kontra jornalistas sira. Iha kazu ne’e,  se wainhira journalista halao nia funsoens ho responsáveis no respeita valores diverzensia nudar kultura hodi hariku no hametin ita nia unidade hanesan fo sai iha Kapitulo I kona ba DISPOSISOENS GERAIS, artigo 3 no 4 (Funsoens da Komunikasaun Sosial no Deveres da Komunikasaun Sosial), klaru los katak journalista sei sai amigo diak polisia nian. 

VI.  KONKLUZAUN

Lei Komunikasaun Sosial husi pontu de vista kona ba servisu Polisia nian nudar Instituisaun nebe promove kondisoens  seguransa hodi garante funsionamento normal husi instituisoens demokrátikas no garantias liberdades ba ninia sidadãos no Garanti  manutensaun no ordem seguransa ho tranquilidade públika,  mos hakarak rekomenda ba iha media sira atu bele hahu’u ona ninia reportagem  ho kuidadosa, katak : a) Fontes de dados de validade tenki testado. b) Informasaun  tengki kredível no kompetente. c) Tenki verifika informasaun molok tama ba iha nutisias (Check & Re-Check)

Meios de komunikasaun  tengki enfatiza ona princípio  kobertura nian husi partes nebe lahanesan ho forma equilibrada (cover both sides). No tengki hatudu qualidade  kobertura husi informasaun nebe mak fo sai ba publiku. Hamosu ona tipu reportagem journalismu ba dame (peace journalism) hodi  halakon apresentasaun    ho topiku provokativu nebe mak  injusto, emosional, ho interesse tendensiozu ba objeto notísia nian. Hanesan  "provokador", Atuasaun Polisia hanesan Koboi, Polisia fo apoiu  atividade ilegais.  No tengki halao ona separasaun saida mak instituisaun no pesoal. Labele tamba pesoal ida nia hahalok, Media uza instituisaun nia naran halo publikasaun.

Ba oin Servisu journalismu  sei hasoru obstaklu no dezafio bo’ot tamba dinâmika pluralidade husi aspirasoens publiku nebe maka sei aumenta husi tempu ba tempu. Tamba ne’e ba futuru oin mai media tengki akomoda  aspirasoens hotu no laos sai fali fatin propaganda ema balun nia interese hodi hamosu paniku no rumoris ba publiku.

Tamba servisu iha area journalismu nian hanesan mos ho servisu Polisia nian servisu ba  kontrolu sosial iha kontexto ba kriasaun no implementasaun do Estado de direito demokratiko.  Kuandu media halo krítikas e sugestões kona ba polítika no decisões ruma, media hakarak ona ajuda atu promove maturidade demokrátika hanesan mos Polisia wainhira defende LEI no ORDEM hakarak atu promove iklima moris hakmatek ba ninia sidadaun..Tamba servisu iha area journalismu no polisia,  laos komersializasaun mak sai  objetivo final maibe proklamasaun ba lia los kona ba situasaun nebe iha. 

Ita hein no espera katak LEI KOMUNIKASAUN SOSIAL nebe mak iha bele ona sai matadalan nebe journalista sei uza hodi promove lia los ba povu Timor Leste.No mos sai fatores nebe determina hodi harii boa relasaun servisu entre media no Polisia.

Artigu ne’e nudar hanoin pesoal no la representa husi instituisaun nebe hakerek nain haknar ba.

Renato da Costa

Observador Media

renato_costa25@yahoo.com

77884674

.