Ema balun mobiliza boikota iha Costa – La iha kapasidade lideransa

.

Jornal Nacional Diário

Asaun boikota ne’ebe komunidade Suku Costa, Posto Adiministrativu Oecusse, Enklave Oecusse, halo hasoru Prezidenti Republika (PR), Taur Matan Ruak, foin lalais ne’e, deskunfia ema balun maka mobiliza no sukit iha kotuk.

Liu husi dialogu komunitaria PR Taur ho komunidade sira iha Suku Costa, la hatudu vontade partisipa no la iha ema ruma maka mobiliza komunidade sira. tanba ne’e, membru Parlamentu Nasional (PN) nudar mos Atoni oan sente preokupadu tebes no kondena maka’as ema ne’ebe maka mobiliza asaun refere.

“Hau dehan ona autoridade Zona Espesial Ekonomia Sosial Merkadu (ZEESM) Oecusse balun la iha kapasidae atu sai lider. Se autoridade ne’e iha kapasidade nia la tau sekretariu rejiaun bar-barak, uluk tinan 5 neba hau mesak, hau mos infrenta problema falsifikasaun kartaun eleitor nebe barak teb – tebes, mais hau konsege hamutuk ho Governu sentral bele rezolve, maibe autoridade balun rezolve deit problema veteranus ema tolok nia, koalia arbiru deit ba povu, dun arbiru deit ba povu dehan povu laos veteranus, povu tenki hatudu sira nia kilat, totalmente autoridade ne’e la hatene sai lider,” afirma membru PN husi Bankada FRENTI-MUDANÇA, Jorge da Conceição Teme iha PN, Kinta (03/11/2015).

Jorge Teme dehan, vizita PR Taur Matan Ruak hanesan lider masimu iha RDTL ne’e, tanba ne’e autoridade rejiaun sira moralmente tenke mobiliza komunidade atu simu prezensa Prezidenti Republika.

“Se hatene sai lider mak Xefi de Estadu ba nia mai hasoru, se nia la mai entaun nia mak tau lia ba xefi suku sira, xefi aldea sira no povu para la bele mai hasoru Prezidenti Republika, nia keta mehi ho nia ambisaun ne’e, nia hanoin ho nia hahalok hanesan ne’e povu atu louva nia, ne’e hau la fiar,” hateten Jorge Teme ho siniku.

Informasaun ne’e hafutar iha Oecusse katak, iha autoridade balun maka mobiliza asaun boikota hasoru PR Taur Matan Ruak. Maibe, Jorge Teme fiar katak, loron ruma ‘ikan dodok’ ne’ebe falun iha hena mutin nia laran ne’e sei iis no halo ema barak sei horon kona.

Iha fatin hanesan membru PN husi Bankada PD, Paulino Monteiro, husu atu halo investigasaun profunda ba atitude boikota ne’e. liu-liu, Ministeriu ESTATAL tenke aprofunda koordenasaun ho autoridade lokal sira hodu buka provas ba situasaun ne’e.

Membru PN husi Bankada CNRT, Arão Noe de Jesus, lamenta tebes, tanba Xefi Estadu la’os kualker ema, tanba ne’e, povu tenke mobiliza malu hein prezensa PR Taur Matan Ruak nian.

“Atuasaun ne’e la merese atu halo ba ita nia Xefi Estadu,” hateten Deputadu Arão Noe de Jeues.

“Hau hanoin Polisia bele halo atuasaun mais agora tenki persiza faktus katak los duni ka lae, ou keta povu mak la informadu,” hateten Arão Noe. nes

.