PR Taur agradese média TL

.

Jornal Nacional Diario - 14 de dezembro de 2015

Prezidente da Repúblika Taur Matan Ruak agradese media hotu iha Timor Leste, tanba durante ne’e esforsu an hodi la’o tuir nia atu vizita Suku hotu iha Timor laran tomak, maske tenke la’o ain.

“Ha’u agradese imi jornalista sira, tanba bele ajuda halo kobertura ba vizita ha’u nian, iha munisipiu Baucau, espesialmente iha Postu Administrativu Venilale,” dehan Taur Matan Ruak ba jornalista sira hafoin dialogu ho komunidade iha Suku Kaebada Makasa’e, Postu Administrativu Baucau Vila, Munisipiu Baucau, Sabadu (12/12).

Xefe Estadu ne’e haktuir, durante ne’e, media sira nunka baruk hodi akompaña nia vizita iha Suku hotu iha Timor laran, maske iha Suku balu tenke la’o ain.

Taur Matan Ruak dehan, media nia papel importante tebes ba prosesu dezenvolvimentu nasaun nia,

Xefe Estadu ne’e esklarese, liu husi media mak povu bele hato’o sira nia preokupasaun hodi Estadu bele fó solusaun.

Tanba ne’e, Taur Matan Ruak husu ba jornalista sira atu labele baruk hodi akompaña nafatin vizita Xefe Estadu ne’e nian, ba Suku sira ne’ebé mak nia seidauk vizita.

Xefe Estadu ne’e, vizita ona Suku 381 iha nia mandatu durante tinan tolu ne’e no hela Suku 61 mak seidauk.

Nia esklarese, problema bee moos, saude no edukasaun i estrada ne’e, sai preokupasuan bo’ot ba povu iha Timor laran tomak.

“Ha’u halo ona vizita ba Suku 381 iha Timor laran tomak, iha ha’u nia vizita sira ne’e, povu preokupa barak liu kona-ba estrada, bee moos, eletrisidade, saúde no edukasaun, agrikultura no problema veteranus nian,” dehan Taur Matan Ruak.

Xefe Estadu ne’e dehan, avaliasaun ne’ebé nia halo durante ne’e, positivu tebes, tanba populasaun kontinua levanta problema kona-ba bee moos no estrada, inklui mós saúde no edukasaun.

Nia fó ezemplu katak, hanesan iha postu Administrativu Venilale, povu tenke mai sosa bee iha Baucau vila, tanba bee laiha.

Iha programa vizita Suku ne’e, Taur Matan Ruak sempre lori Administrador ida husi Munispiu Seluk, no Xefe Suku ida husi Postu Administrativu ida hodi halo komparasaun entre sira nia Munisipiu ho Munisipiu seluk, kona-ba progresu dezenvolvimentu rai laran.cos

.