“Lere Deskonfia Ema Balun Apoiu Prijineiru Revolta”

.

Jornal Independente - Sesta-feira, 08 Novembru 2013 

Brigadeiru jeneral FALINTIL-Forsa Defeza Timor-Leste (F-FDTL) Lere Anan Timur deskonfia ema balun mak haruka prijioneiru nain 24 hodi halai sai husi prijaun Becora iha Domingo foin lalais. 

Tuir Lere, laiha fundamentu bainhira guarda Prijioneiru sira hateten katak, sira lahatene tanba saida mak prijioneiru sira halai. “Guarda Prijionais lahatene tanba saida mak (Prijioneiru) sira halai, laiha fundamentu ne’e…!, katak Lere hafoin hasoru malu ho Prezidenti Republika iha palasiu prezidensial, Aitarak-Laran, (07/11). 

Tuir nia prijioneiru sira ne’ebe halai diferenti ho prijioneiru politiku hanesan ho grupu (matebian) eis major Alfredo ne’ebe halai iha tinan 2006. 

Tan ne’e, nia dehan, bainhira kaptura fali tenke aumenta sentensa ba sira, balun ne’ebe nia sentensa tinan 10 aumenta ba tinan 15. Entertantu, Polisia Nasional Timor Leste (PNTL) halao kooperasaun ho Polisia Republika Indonesia (POLRI) no Tentara Nasional Indonesia (TNI) iha Fronteira hodi bele buka tuir prijioneiru Timor-oan balun ne’ebe mak deskonfia halia ba Indonesia. 

Segundu Koamdante PNTL Komisariu Afonso Jesus hatete oras ne’e PNTL mos kopera diak ona ho TNI no POLRI atu bele buka tuir prizioneiru sira. 

Deklarasaun ne’e hato’o relasiona ho prijioneiru nain ida neebe hetan kaptura husi Unidade Polisia Fronteira iha area fronteira bainhira tenta halai ba Indonzia. Prijioneiru nain 24 ne’ebe mak halai sai husi prizaun Becora iha Domingu (3/11) dader, to’o oras ne’e Polisia konsege kaer ona ema nain 16.

.