Deskonfia Lori Aimoruk ba Mauk Moruk KOK Hurlele Pesoal Mediku

.

Timor Post - 02 de julho de 2015

DILI—Pesoal médiku iha Postu Saúde Saelari-Postu Administrasaun Laga-Munisípiu Baucau, ho naran Adriano Barbosa hetan baku (hurlele) hosi membru Komandu Operasaun Konjunta (KOK) tanba deskonfia lori aimoruk ba suporta Paulino Gama Mauk Moruk ho nia grupu.

Akontesimentu ne’e iha loron Kuarta (01/07) tuku 09:30, iha Suku Saelari.

Vítima Adriano informa kronolojia akontesimentu ba Assosiasaun Médiku Timor Leste (AMTL), haktuir, nia sai hosi postu saúde  Saelari ho motorizada atu ba foti aimoruk iha sentru saúde Laga.

Depois de foti tiha aimoruk atu fila hosi sentru saúde Laga besik ona iha postu saúde  Saelari maka hetan dezentendimentu hosi membru KOK nain rua iha dalan hodi tuku nia.

Hafoin hetan baku vítima  evakua kedas ba postu saúde  Saelari, tanba hetan pankada iha hasan too bubu maka’as.

Asosiasaun Médiku Timor Leste (AMTL), lamenta tebes ho atetude membru KOK nain rua ne’e.

“Ami kondena tebes ho hahalok ne’e,” afirma Sekretáriu Jerál AMTL Flâvio  Brandão ba jornalista iha HNGV, Bidau, Kuarta (01/7).

Frlâvio hatete, liafuan ne’ebé maka membru KOK sira hasai ba pesoal médiku to’o baku tan, ne’e hahalok ida la di’ak, tanba ne’e atu klarifika ba komponente hotu-hotu katak médiku sira hala’o  servisu profisional atu fo asisténsia  médika  ba ema ida la hare ba kor, rasa no la hare ba nia estatus poilitika.

Flâvio esplika, médiku nia papel maka atu fo asisténsia  médika  ba ema sé  de’it  maka moras bainhira nia husu atendimentu médiku ninian, ne’ebé pesoal médiku ida ba foti aimoruk iha sentru saúde  Laga, ne’e atu hodi ba fo atendimentu ba públiku, la’ós atu halo atendimentu ilegal.

Tanba ne’e husu ba forsa KOK atu iha atensaun di’ak liu ba sira nia aktividade duke ba baku, tuku no dun fali pesoal saúde  mos inklina iha grupu ne’ebé KOK sira buka ba.

Flâvio husu atu ema hotu fo asisténsia  ida di’ak ba pesoal saúde  sira hotu iha teritóriu  Timor, tanba populasaun barak maka presiza sira nia asisténsia  médiku iha area remotas.

Hosi akuzasaun ne’ebé KOK halo ba pesoal médiku iha Saelari, tuir Flâvio  sei hakerek karta eskrita ida haruka ba Komandu  operasaun atu presiza investiga hahalok ne’ebé maka menbru KOK nain rua halo iha terenu la tuir lei no orden. (gus)

.