Kareta Eskoltu Xanana Gusmão Baku Fila Iha Baucau

.

Jornal Nacional Diário - 24 de julho de 2015

Kareta Hilux koor azul Polisia Corpo Seguransa Pessoal (CSP) Ministru Planeamentu Investimentu Estrateziku (MPIE) Kay Rala Xanana Gusmão nian baku fila iha área Kaisidu Baucau , maibé la rezulta eskolta ruma kanek.

Asidente ne’e akontese, bainhira eskoltu Ministru Xanana Gusmão hala’o vizita ba masakre Tchaivatha iha Lautem, fila mai liu iha área estrada parte Kaisidu- Baukau nian iha oras tuku 4:25 lokoraik.

Kareta eskoltu Xanana ne’e, lori diretamente husi Komandante Sargento Chefe, Boby Gonsalves “GON” ho eskoltu nain tolu iha kareta laran hanesan, João Ximenes no José Soares no Justino Soares.

Iha asidente ne’ebé la espera ne’e, la rezulta eskoltu ruma kanek, tanba karreta halai neneik.

Hafoin asindente ne’e akontese, liu tiha menutu balun, Komandante CSP, Olavio Mendes ho nia kolega sira to’o kedas iha fatin, hodi tu’un ajuda dada sai Komandante Boby ho nia kolega sira sai husi karreta laran inklui salva mós kilat sira iha karreta laran.

Komandante Boby Gonsalves informa katak, karreta ne’e baku fila tanba, estrada foun ne’ebé komunidade sira foin halo, no estrada ne’e rasik fatuk rahun nakonu, entaun kareta kois, no rai rahun mós falun metin to’o karreta halai sai husi dalan ba soke belit iha fatuk leet.

“Ami akompania exelencia Ministru Xanana Gusmão ho nia karreta iha kotuk halai neneik, maibé rai rahun makas no no estrada ne’e foun, tanba ne’e karreta halai sai husi dalan baku fila belit ba fatuk le’et,” dehan Komandante Boby ba Jornalista sira via telephone, Kuarta (22/07).

Asidente rezulta karreta kondisaun (bidtru oin) no odamatan liman karuk mak rahun, maibé kondisaun karreta di’ak hela.

Entretantu hafoin asidente, Ministru Xanana mós hakfodak hodi husu ba nia eskoltu sira atu halai karreta neneik.

Asindente ne’e halo Eis Primeiru Ministru Xanana Gusmão mós preokupa no husu kedas informasaun kona-ba ninia kondisaun kada eskoltu sira.

“Katuas mós preokupa no hakfodak, hodi husu kedas sira hotu di’ak kalae, maibé kolega eskoltu sira dehan sira di’ak,” katak Boby.

Hafoin fila mai to’o Dili, Xanana Gusmão autorija eskoltu nain tolu ne’e ba hala’o kedas check up ba sira nia kondisaun saúde iha hospital nasional.

Hafoin akontesementu ne’e, Ministru Defeza, Cirilo Cristovão ho Ministru Obras Publiku, Gastão de Sousa ho nia eskolta sira to’o kedas iha fatin hodi hamutuk ho eskolta sira tu’un ajuda ekoltu sira.

Entretantu hafoin asidente ne’e liu menutu balun de’it, polisia tranzitu Baucau nian to,o iha fatin akontesmentu hodi sukat no hamutuk ho eskolta sira dada kedas karreta ne’e sai no lori kedas mai Dili.cos

.