Jornal Independente - Kuarta-feira, 26 Fevereiru 2014
Bancada Opozisaun FRETILIN iha Uma Fukun Parlamentu Nasional (PN)
kontinua ezije prosesu investigasuan ba kareta Parlamentu Nasional
ne'ebe nia mesin Hilux bodi Prado.
Membru Bancada FRETILIN, Inacio Moreira hateten, nia parte seidauk
konfirmadu kona ba prosesu investigasaun ba kareta PN ne'e.
"Hau hanoin prosesu investigasaun kona ba kareta PN ne'e, ita husu ba
Prezidenti PN ho nia administrasaun tomak, tanba ami bancada FRETILIN
halo ona deklarasaun politika maibe hetan ona investigasaun ruma ona
ka seidauk," dehan nia iha PN, horsehik.
Kareta Prado ne'e, sosa husi Kompania Auto Timor iha tinan 2012 ba
membru legislativu foun hamutuk 65 iha PN, hafoin kareta ne'e to'o
mai, Partidu opozisaun identifika marka kareta ne'e la tuir Bill Of
Quantity (BoQ), tuir lolos sosa kartea ho marka Prado, maibe realidade
kareta Xapa Prado maibe nia makina Hilux.
"Hau uluk iha ne'e deputadu sira balun koalia tan no hau seplika ba
sira teknikamente kona ba espesifikasaun hotu-hotu kona ba kareta ne'e
presiza tempu naruk atu halo esplikasaun maibe departementu kompotente
iha PN mak tenke halo inkaminamentu atu bele haree asuntu refere,"
dehan Inacio ba INDEPENDENTE iha uma fukun PN (25/2).
Tuir nia, kompania Auto Timor mak halo akuizasaun kareta PN hamutuk 65
no importa mai iha Timor-Leste hodi fasiluta ba membru deputadu sira.
Iha fatin hanesan, Vise Prezidenti parlamentu Nasional (PN) Aderiot
Hugo da Costa hateten, atu halo investigasaun ba asuntu ruma ou kareta
PN ne'e direitu deputadu nian atu halo rekerementu.
"Se ema ruma halo keisa ba iha ne'eba, ema deputadu ne'e toma
responsablidade ba keisa ne'ebe nia hatama se ho deklarasaun deit hau
hanoin ne'e laiha baze legal ida atu halo investigasaun," dehan nia.
"Ita dehan kareta Prado no kareta Hilux ninia mesin ne'e Toyota tanba
Toyota mak nia serial ne'e Hilux no serial Prado, se ita deha mesin
Hilux bodi prado ne'e hau lahatene tanba buat rua ne'e ida deit,"
tenik nia.
Maibe, deputadu balun dehan iha indikasaun ruma lalos kona ba
ajudikasaun ka tenderizasaun ba kareta PN bele avansa ba oin.
"Ita haree deputadu ne'ebe foti kestaun ne'e nonok deit iha fatin,
ne'e hatudu halo espekulasaun informasaun ida ho nia espesifikasaun
hanesan kartea Prado no nia motor Hilux," nia lamenta.
Tuir informasaun ne'ebe diario ne'e asesu katak, kazu ne'e oras ne'e
Komisaun Anti Korupsaun (KAK) halao hela investigasaun.
.
Sem comentários:
Enviar um comentário
Nota: só um membro deste blogue pode publicar um comentário.