"La Sama Konsidera SEOP 'Cow Boy"

.

Jornal Independente - Sesta-feira, 07 Fevereiru 2014

Vise Primeiru Ministru (VPM), Fernando La Sama de Araujo hateten desizaun Sekretariu Estadu Obras Publika (SEOP) hodi haruka kompania sira kaer projeitu emerjensia laiha kontratu no laiha konesementu ne'e konsidera hanesan Cow Boy.

Vice PM dehan, tuir lolos atu halo projetu ida tenki iha halo uluk kontratu mak foin bele implementa. "BUat ne'e la'o lolos mak ne'e, atu halo projetu ida tenke iha kontratu, no halo kontratu tenke haree ba orsamentu, osan iha ka lae, labele lao hanesan Cow Boy, tuir lolos labele hanesan ne'e," Vise PM preokupa, iha Embaixada EUA Pantai kelapa horseik.

Iha parte seluk kompania sira ne'ebe maka halo remata ona projetu emerjensia ne'e kontinua ezije SEOP atu selu. Maibe, iha orsamentu jetal estadu 2014 nian ne'ebe mak aloka ba iha SEOP liliu atu atende ba iha projetu emerjensia ne'e rasik orsamentu kiik tebes. Tanba, dividas ne'ebe mak mosu ho total osan hamutuk milaun $74 dolar Amerika, maibe osan iha tinan 2014 atu aloka ba hodi atende projetu emerjensia ne'e ho de'it montante millaun $30.

Ho ida ne'e, Vise PM husu Ministeriu Obras Publiku (MOP) atu tuur hamutuk hodi rejolve problema iha internal ministeriu nian. Maske nune'e, Vice PM kontinua dehan Governu sei la selu projetu emerjensia ne'ebe mak laiha kontratu.

"Se selu, bainhira iha kontratu, kuandu laiha kontratu laiha osan, tanba kuandu mosu kontratu ne'e tenke haree no preve orsamentu mak foin halo buat ida, atu nune'e ita moris iha estabildiade no iha Governu ida nia laran," dehan La Sama.

Kona ba divida ne'ebe mak halo husi SEOP ho montante millaun $74 ne'e, Vise PM seidauk hatene klaru nia total, maibe tuir nia hatene katak, nia implementasaun projetu emerjensia ne'e, iha duni ema ida-idak mak ba sukat ninian (Estrada), ba sukat mota ida ne'e halo problema.

Tuir lolos, ida ne'e labele akontese, tanba buat hotu tenke moris iha planu ida nia laran, labele ida-idak ba lori metru sukat ninia depois dehan ho (ami) book dadauk ona, depois osan iha ne'ebe atu selu.

Projetu emerjensia ne'ebe mak husi SEOP nian haruka kompania sira hala'o ona mak hanesan iha Distritu manatutu, Ainaro, Suai, Manufahi no Viqueque.

Iha Distritu lima ne'e, projetu emerjensia ne'e rasik kompostu husi fatin hamutuk 152, no total osna ne'ebe mak iha atu selu ba kompania sira ne'e hamutuk millaun $74.

.