Mauk Moruk: "Lakohi Harii Partidu, Kaer Metin FRETILIN Movimentu"

.

Jornal Nacional Diario - Kinta-feira, 27 Fevereiru 2014 

Prezidente Konsellu Revolusaun Povu Maubere (KRPM), Paulino Gama 'Mauk Moruk' konsidera katak konstituisaun Republika Demokratika Timor-Leste (RDTL) nian la loos tanba ne'e nia sei la harii Partidu politiku maibe sei metin iha FRETILIN Movimentu hodi defende Povu nia direitu. 

Eis komandante Brigada Vermella, Mauk Moruk hateten lia hirak ne'e relasiona ho ejizensia sosieade nian para Mauk Moruk nia grupo atu harii Partido hodi kompete iha eleisaun karik povu hili bele muda buat ne'ebe nia konsidera la loos ne'e. 

"Kria partido ne'e mak hau hakarak koalia iha ne'e, kria partidu ne'e mak kuandu lei konstituisaun loos hau tama, hau enkaixa iha laran kria Partido tanba la loos ne'e mak hau lakohi," dehan mauk Moruk ba JNDiario iha sede KRPM, Fatuhada Dili, Tersa (26/2). 

Nia parte prevaleja principio hodi movimenta Frente Revolusionariu Timor-Leste Independente (FRETILIN) tanba ne'e Mauk Moruk konsidera Prezidenti partidu FRETILIN, Francisco Guterres 'Lu-Olo' bosok wainhira deklara katak, nia maka FRETILIN. 

"Hau prevaleje hau nia prinsipiu hodi movimenta FRETILIN, kuandu Lu-Olo dehan nia FRETILIN, nia borok," Mauk Moruk dehan. Mauk Moruk konsidera katak, lei konstituisaun ne'ebe mak oras ne'e dadauk Timor-Leste uza ne'e kopia husi Portugal tanba ne'e mak nia parte konsidera knstituisaun la loos. 

Tamba konstituisaun ne'ebe hahu depois proklamasaun independensia Timor-Leste nian iha dia 28 de Novembru 1975 artigo lakon hotu. 

"Konstituisaun ne'e malae Portugues nian maka sira Copy ne'e maka hau dehan la loos, tanba konstituisaun ne'e husi ita nia konstituisaun ne'ebeke hahu iha dia 28 Novembru depois de proklamasaun unilateral 1975 ne'e karik hau simu mais konstituisaun ida ne'e nian artigo hira lakon hotu," dehan Mauk Moruk. 

Aleinde ne'e, nia mos afirma katak, iha restaurasaun ba independensia emblema, inu revolusaun, inu patria-patria no inu nasional halakon hotu. 

Por pouco foin dadauk restaurasaun Independensia iha tuir mai ukun rasik an ne'e emblema, inu revolusaun, inu patria-patria, inu nasional sira ne'e halakon hotu hau rona dehan tau fali bandeira UDT ga saida ga? 

Sira hakarak dehan buat ida ke seluk? Ema mate ba ida ne'e ribuan (mil,red) agora ida ne'e hanesan o sadik fali mate bian sira ne'e," Mauk Moruk, lamenta. 

Tamba nee Mauk Moruk husu ba Prezidenti Partido FRETILIN, Lu-Olo ne'ebe hanesan eis Prezidenti Parlamentu nasional iha Primeira Lejislatura tenki responsabliza. Konaba ukun nain hanesan, Mauk Moruk afirma katak, ukun nain iha Timor-Leste labele sai liu rai iha povu nia terus no kiak nia leten. 

"Sira tenkei servi povu nia interese, povu kiik sira, la'os iha ne'eba atu hanesan fali liu rai boot atu povu haruk ba nia," dehan mauk Moruk. 

Mauk Moruk hateten, Povu sei moris terus maibe ukun nain sira mak goja, ukun nain sira ne'ebe mak oras ne'e dadauk hetan kadeira mak goja tamba ne'e labele ameasa ho lei tamba KRPM defende povu nia direitu atu moris diak. 

 Hatan kona ba lamentasoens husi deputadu sira iha parlamentu nasional (PN) ne'ebe koalia kona ba respeita estadu, Mauk Moruk hateten diak liu ba aprende barak liu tan tamba estadu mak povu, povu mak estadu tamba ne'e presiza ba estuda makas liu tan sobre lei ne'ebe maka deputadu sira halo hodi defende nia an no interese ne'e maka membru PN sira iha. 

"Deputadu, Eladio Faculto, Manuel Gaspar, Bendita Magno no Francisco da Costa, imi be hirak ne'e KRPM sujere ba imi, diak liu imi ba hamutuk ho imi nia maun Lu-Olo hodi aprende politika no konstituisaun ho lei sira ne'ebe ke imi halo hodi defende deit imi nia interese lubuk ida nian iha PN hodi sai mos hanesan parasistas sira ba hodi moris povu kiik, kiak no mukit nia kosar ben no matan ben," dehan Mauk Moruk. 

 Mauk Moruk mos konsidera membru PN sira ne'e koalia ho ibun tutun deit maibe lahatene definisaun konseitu estadu nian. 

 Mauk Moruk mos ejiji presiza justica ba krime sira ne'ebe halo durante funu naruk, tempu invazaun Indonesia nian hahu husi 1975 to'o 1999 atu nune'e povu bele moris hakmatek iha paz no dame laran.

.