"Xanana Kontinua Dezafia Jerasaun Foun Atu Kaer Ukun"

.

Jornal Independente -Sesta-feira, 28 Fevereiru 2014
 

Primeiru Ministru, Kay Rala Xanana Gusmao kontinua dezafia no enkoraza jerasaun fun sira atu kaer ukun iha kualker tempu no situasaun. 

 Liafuan ne'e, PM Xanana fo sai ba publiku relasiona ho nia planu atu rezigna aan iha tempu besik nia laran. Xanana dehan, oras ne'e dadauk jerasaun foun sira iha Timor-Leste barak tebes, maibe seidauk iha mentalidade ida ne'ebe diak atu kaer ukun no lori povu no nasaun ne'e ba oin.

 "Ohin loron iha mestradu barbarak, maibe sira nia problema mak baruk teen, sira nia problema mak egoizmu," hateten PM Xanana, iha Centro convensoes Dili (CCD), horsehik. 

 Tanba ne'e, Xanana dehan, molok atu rezigna aan, nia sei halo debate publiku ida hodi halibur hamutuk matenek na'in sira, liu-liu jerasaun foun sira atu troka ideia ba malu, ho ideias ne'ebe mak atu dezenvolve nasaun no povu TL.

 "Tanba ne'e, atu sai diak, ita konvoka debate sistematiku ida, ami sei tuur iha ne'e ho ita boot sira (jerasaun foun) hodi koalia kona ba social ekonomia, relasaun internasional, kona ba finansa, kona ba saida deit mak iha ita nia rain atu ita hanoin ba dezenvolvementu TL nia diak," katak Xanana.

 Xanana konta, iha tempu rezistensia (funu laran), balun iha ai laran no barak liu iha vila, balun estuda balun servisu, hotu-hotu ho hanoin ida atu liberta rai husi funu no invazaun.

 "Ohin loron iha ona ukun an ona, ita la tuur hamutuk buka haree dehan katak atu dezenvolve ita nia rain, maibe lae ita ida-idak haree dehan katuas ona neebe to'o ona, pakas ona, dehan PM Xanana.

 "Hau fo ezemplu ida deit, karik mak hotu-hotu hanoin dehan katak ita funu atu liberta rai, iha ai laran depois Nicolau Lobato mate, kuadru politiku barak dehan Nicolau Lobato mate ona ita atu halo saida, iha fatin balun mos dehan hanesan ne'e, tanba ne'e hau (Xanana) dehan ba sira ita atu liberta ita nia rai ka ita atu liberta Nicolau Lobato, hanesan mos situasaun agora, ita atu dezenvolve xanana ka dezenvolve nasaun Timor-Leste," dehan xefe do Governu ne'e.

 Nune'e, Xanana realsa liu tan katak, ho liafuan hirak ne'e, nia laos atu hirus jerasaun foun sira, maibe atu doko jerasaun foun sira para iha hanoin hodi lori povu ba moris diak.

 Nia hatutan, maske jerasaun foun iha matenek barak ona, maibe jerasuan foun mak sei kontinua kaer ukun tamba ne'e tenki korazen no muda mentalidade hodi ukun ho los.

 "Imi mesak professor, mestradu, lisensiadu, tamba ne'e tau took matenek sira ne'e ba para ita haree to'ok," dehan Xanana.

.