"OJE 2014 Promulga Ona"

.

Foto, Facebook

Jornal Nacional Diario - Tersa-feira, 04 Fevereiru 2014 

Prezidenti Republika (PR), Taur Matan Ruak, promulga ona orsamentu Jeral do estadu (OJE) 2014 nian ne'ebe mak Prezidente parlamentu Nasional (PN), Vicente Guterres aprezenta iha dia 28 fulan Janeiru 2014. 

Liu husi Komunikadu ne'ebe mak JNDiario hetan husi gabinete Prezidenti Republika katak, Prezidenti Republika promulga OJE ne'e iha segunda (3/2). Prezidenti Republika hahi'i OJE 2014 nia solusaun balun, maibe xefe estadu preokupa nafatin ho pais nia dependensia ne'ebe as ba fundu petroliferu no mos ba ezekusaun orsamentu ne'e rasik. 

Promulgasaun OJE 2014 halao iha loron dahaat, loron servisu nian, sura husi loron ne'ebe dokumentu ne'e simu husi Parlamentu nasional. Hamutuk ho promulgasaun diploma nian, Xefe Estadu haruka mos mensajen ida ba Parlamentu nasional (PN) ho konesementu ba Governu tuir termus (art. 86 e) konstituisaun RDTL. 

Parlamentu nasional tenki buka kontribui be ezekusaun OJE 2014 ne'ebe justu no rigroju. Xefe Estadu mos preokupa maka'as ba Timor-Leste nia dependensia as ba reseita publika sira ne'ebe mai husi petroleum, tamba ne'e xefe Estadu apela ba Governu atu halo diversifikasaun ba atividade ekonomika produtiva. 

Prezidenti da Republika fo korajen mos ba Governu ho Parlamentu nasional atu halo tuir kalendariu orsamentu ne'ebe preve iha lei orsamentu no jestaun finanseiru ne'ebe tuir loloos orsamentu estadu tenki hatama husi Governu e labele liu husi loron 15 fulan-Outubru no hetan aprovasaun husi parlamentu nasional iha tempu ne'ebe natoon, atu bele garante OJE tama iha vigor iha inisiu tinan tuir mai. 

.